Лондан: бітва палітыкаў-католікаў за будучыню народа
Аляксандр Амяльчэня - Vatican News
Сэр Эдвард Лі, найстарэйшы чалец Палаты абшчын, і баранэса Нуала О’Лоан з Палаты лордаў адкрыта выступілі супраць ініцыятыў, якія яны лічаць разбуральнымі для грамадства.
Законапраект аб "дапамозе ў паміранні", які ўжо прайшоў праз ніжнюю палату ў чэрвені 2025 года, зараз сутыкаецца з сур'ёзнай крытыкай у Палаце лордаў з прычыны шматлікіх хібаў і недахопаў. Касцельныя лідары і палітыкі падкрэсліваюць, што дзяржаўная медыцына павінна дапамагаць людзям жыць, а не спрыяць іх смерці.
Як паведамляе “OSV News”, асаблівую трывогу выклікае папраўка аб дэкрыміналізацыі абортаў на любым тэрміне цяжарнасці, якую Эдвард Лі назваў "абуральнай". Гэта адбываецца на фоне рэкорднай колькасці абортаў у Вялікабрытаніі, якая ў 2023 годзе наблізілася да 300 тысяч выпадкаў. Каталіцкія дэпутаты настойваюць на тым, што замест пашырэння доступу да такіх працэдур трэба ўзмацняць абарону ненароджаных дзяцей і падтрымліваць сем'і.
Нягледзячы на тое, што сучасная культура робіць стаўку на асабісты выбар, баранэса О’Лоан перакананая, што намаганні па абароне жыцця не з’яўляюцца дарэмнымі. Яе пазіцыю падзяляюць нават некаторыя свецкія калегі, якія таксама лічаць чалавечае жыццё недатыкальным.
Каталіцкі епіскапат Брытаніі падтрымлівае гэтыя намаганні, заяўляючы, што 2025 год быў адзначаны сапраўднай "атакай на каштоўнасць чалавечага жыцця".
