Абарона жыцця і права: біскупы ЕС крытыкуюць рашэнне Бруселя
Аляксандр Амяльчэня - Vatican News
Рашэнне Еўрапейскай камісіі выкарыстоўваць агульныя сродкі для падтрымкі так званага "абартыўнага турызму" стала падставай для сур’ёзнай занепакоенасці ў каталіцкім асяроддзі. Арцыбіскуп Антуан Эруар, віцэ-старшыня COMECE, у інтэрв’ю для “Vatican News” назваў гэты крок ігнараваннем прынцыпаў, на якіх грунтуецца Еўрапейскі саюз.
Брусель плануе дазволіць выкарыстанне рэсурсаў Еўрапейскага сацыяльнага фонду плюс (ESF+) для аплаты працэдур перарывання цяжарнасці. Хоць асобны фонд для гэтых мэт стварацца не будзе, сам факт прыцягнення агульнаеўрапейскіх грошай выклікаў вострую рэакцыю з боку Касцёла.
Еўрапейскія інстытуты выходзяць за межы сваіх кампетэнцый
Арцыбіскуп Эруар падкрэсліў, што такая пазіцыя з’яўляецца парушэннем фундаментальных трактатаў. Дакументы абавязваюць Саюз паважаць суверэнітэт дзяржаў-чальцоў у пытаннях вызначэння палітыкі аховы здароўя і медыцынскіх паслуг. Брусель фактычна спрабуе ўмяшацца ў сферу, якая цалкам падпарадкоўваецца нацыянальнаму заканадаўству.
Французскі іерарх адзначыў, што гаворка ідзе пра чарговую спробу абысці паўнамоцтвы краін ЕС. Паводле яго слоў, этычныя пытанні, і асабліва праблема абортаў, павінны вырашацца на дзяржаўным узроўні, бо прававыя нормы ў гэтай галіне істотна адрозніваюцца ў розных краінах супольнасці.
Парушэнне прававога балансу пагражае адзінству Еўропы
Прадстаўнік COMECE выказаў жаль з нагоды прынятага рашэння, якое не толькі ігнаруе прававыя нормы, але і супярэчыць духу еўрапейскага супрацоўніцтва. Паводле яго меркавання, навязванне такога роду ідэалагічных падыходаў праз фінансавыя механізмы разбурае давер паміж інстытутамі ЕС і асобнымі краінамі.
