У Пакістане адкрылі першы каталіцкі хоспіс
Аляксандр Амяльчэня - Vatican News
У горадзе Хайдарабад, што ў пакістанскай правінцыі Сінд, адбылася знакавая падзея для ўсёй нацыянальнай сістэмы аховы здароўя – асвячэнне дзённага цэнтра паліятыўнай дапамогі пры каталіцкім шпіталі святой Альжбеты Венгерскай.
Ва ўрачыстасці, якая прайшла 12 студзеня 2026 года, прынялі ўдзел апостальскі нунцый у Пакістане арцыбіскуп Джэрмана Пэнемотэ і старшыня мясцовага епіскапату біскуп Самсон Шукардын.
Ініцыятыва стала адказам Касцёла на вострую патрэбу людзей, якія пакутуюць ад анкалагічных захворванняў, паколькі дзяржаўная медыцына Пакістана не прадугледжвае сістэмнай падтрымкі невылечна хворых.
Жыватворны подых суцяшэння
Дзейнасць цэнтра заснавана на прынцыпе “спачувальнай прысутнасці”, якая вяртае пацыентам чалавечую годнасць у іх апошнія дні. Айцец Роберт Макалах, місіянер і член савета дырэктараў шпіталя, падкрэсліў у інтэрв’ю “Agenzia Fides”, што медыцынскія паслугі тут неаддзельныя ад хрысціянскай любові. Цэнтр становіцца месцам, дзе боль сустракаецца з міласэрнасцю, а безнадзейнасць – з хрысціянскім суцяшэннем.
Важнай асаблівасцю праекта з’яўляецца яго поўная бясплатнасць, што жыццёва важна для насельніцтва, якое не можа дазволіць сабе каласальныя выдаткі на анкалагічнае лячэнне.
Салідарнасць па-за межамі
Рэалізацыя праекта стала магчымай дзякуючы міжнароднай падтрымцы, у прыватнасці ўрадавай праграме “Hungary Helps” і ахвярадаўцам з Аўстраліі і Вялікабрытаніі. На цырымоніі прысутнічаў пасол Венгрыі Золтан Варга.
Шпіталь святой Альжбеты, які служыць жыхарам рэгіёна з 1958 года, працягвае заставацца прыкладам міжрэлігійнай згоды, прымаючы пацыентаў усіх этнасаў і веравызнанняў.
Шпіталь ужо меў вопыт паліятыўнай дапамогі на даму, які карыстаўся велізарнай удзячнасцю ў Хайдарабадзе, што і стала штуршком для будаўніцтва стацыянарнага цэнтра. Гэта павінна дапамагчы пазбегнуць сітуацый, калі хворыя паміраюць у пакутах і ізаляцыі.
