Індыя: Касцёл папярэджвае аб разбурэнні маральных асноў краіны
Аляксандр Амяльчэня - Vatican News
Навагодняе пасланне арцыбіскупа Гоа і Дамана стала моцным заклікам да сумлення палітычнага кіраўніцтва Індыі. Кардынал Філіпэ Нэры Ферао 31 снежня 2025 года адкрыта заявіў пра рост пачуцця небяспекі сярод рэлігійных меншасцей.
Паводле яго слоў, апошнія інцыдэнты, асабліва тыя, што адбыліся падчас святкавання Божага Нараджэння, сведчаць пра “эрозію свабоды веравызнання” ў самай населенай краіне свету.
Трывожныя выклікі для дэмакратыі
Іерарх падкрэсліў, што атмасфера страху і няўпэўненасці з'яўляецца балючым сведчаннем таго, як насілле атручвае маральную тканіну народа, які гістарычна славіўся сваёй любоўю да міру.
Як паведамляе партал “Licas.news”, кардынал звярнуў увагу на парадаксальную сітуацыю: хоць Канстытуцыя гарантуе права на свабоднае практыкаванне рэлігіі, пераслед часта адбываецца пры маўклівай згодзе ўлад.
Напады на вернікаў становяцца сістэматычнай практыкай запалохвання
Ферао заклікаў палітыкаў у 2026 годзе ўсвядоміць сваю канстытуцыйную і маральную адказнасць. Ён настойвае на тым, што вінаватыя павінны быць прыцягнуты да адказнасці, каб вярнуць грамадству давер да дэмакратычных каштоўнасцей.
У сваіх пажаданнях іерарх маліўся аб дарах гармоніі і еднасці для ўсёй нацыі, якая зараз перажывае цяжкія выпрабаванні.
Сістэматычны ціск на хрысціян
Гэтыя словы гучаць на фоне трывожнай статыстыкі. Праваабаронцы з “Нацыянальнага форуму кансэкраваных асоб і святароў – юрыстаў” зафіксавалі ў снежні 2025 года значны ўсплёск антыхрысціянскіх інцыдэнтаў. Гаворка ідзе не пра выпадковыя ўспышкі агрэсіі, а пра прадуманую схему крыміналізацыі рэлігійных практык.
Геаграфія нападаў уражвае: ад арыштаў хрысціян пасля малітоўных сустрэч у Раджастане і Утар-Прадэш да забароны спяваць калядкі ў Мадх’я-Прадэш.
Асабліва цынічным выглядае зрыў святочных мерапрыемстваў для невідушчых вучняў у Джабалпуры. Юрысты форуму адзначаюць, што пасіўнасць паліцыі ў такіх выпадках з'яўляецца сур'ёзным парушэннем дзяржаўных абавязкаў, што толькі ўзмацняе крызіс даверу ў краіне.
