Касцёл і Грэнландыя: эксперт пра межы дзяржаўных амбіцый
Аляксандр Амяльчэня - Vatican News
Рыторыка адміністрацыі Дональда Трампа наконт магчымага далучэння Грэнландыі выклікае не толькі палітычныя, але і глыбокія маральныя дыскусіі. У інтэрв’ю "OSV News" прафесар Майкл Дэш з Універсітэта “Notre Dame” адзначыў, што каталіцкае сацыяльнае вучэнне прапануе выразнае бачанне такіх сітуацый.
Эксперт звярнуў увагу на нядаўні заклік Папы Льва XIV адмовіцца ад "дыпламатыі сілы", падкрэсліваючы: жыхары Грэнландыі маюць права на незалежнасць і не жадаюць ператварацца ў амерыканскі тавар.
Паводле слоў Дэша, спробы анексіі Грэнландыі выглядаюць залішнімі, бо Злучаныя Штаты ўжо дзесяцігоддзямі паспяхова карыстаюцца стратэгічнымі аб’ектамі на востраве па дамоўленасці з Даніяй.
Палітолаг лічыць, што ў свеце, напоўненым рэальнымі пагрозамі вайны ва Украіне ці вакол Тайваня, стварэнне новага напружання ў Паўночным паўшар’і з’яўляецца непрадуманым крокам, які супярэчыць прынцыпам міжнароднай салідарнасці.
Будучыня міжнародных адносін, паводле эксперта, павінна грунтавацца на рэалізме, прасякнутым хрысціянскімі каштоўнасцямі. Абапіраючыся на мудрасць святога Аўгустына, Дэш нагадвае, што справядлівы парадак у свеце патрабуе пастаянных намаганняў, але без ілюзій аб стварэнні ідэальнай утопіі.
Менавіта вернасць маральным прынцыпам дапаможа новаму пакаленню будаваць будучыню, дзе павага да суверэнітэту і мір будуць важнейшымі за тэрытарыяльную экспансію.
