Святы 2025 год: выстава Караваджа ў Рыме б'е рэкорды наведвання
Аляксандр Амяльчэня - Vatican News
Выстава, прысвечаная творчасці Мікеланджэла Мерызі (1571-1610), вядомага як Караваджа, выклікала ашаламляльны інтарэс. Уваход на яе магчымы толькі па папярэдняй рэзервацыі, што прывяло да сітуацыі, калі ў выходныя многім ахвотным давялося адмовіць.
Экспазіцыя, арганізаваная сумесна з Галерэяй Баргезэ, уключае творы з міжнародных музеяў і прыватных калекцый. Асаблівую ўвагу прыцягвае апошняе палатно Караваджа – "Пакутніцтва святой Уршулі" (1610). Рэстаўратары выявілі раней нябачныя дэталі: бараду і вусны постаці злева ад святой, кончык носа салдата і абрысы яго шлема.
На карціне адлюстравана мучаніцкая смерць святой Уршулі, брэтонскай прынцэсы, якую забіў стралой кароль гунаў Атыла пасля таго, як яна адмовілася выйсці за яго замуж. Сцэна выкананая ў тыповым для Караваджа стылі, з драматычнымі кантрастамі святла і ценю.
Мастак стварыў карціну ў Неапалі, куды ўцёк пасля забойства папскага афіцэра. Каб паскорыць высыханне фарбаў, ён выставіў палатно на неапалітанскае сонца, што пашкодзіла цёмныя колеры. Караваджа памёр 18 ліпеня 1610 года, не дачакаўшыся папскага даравання.
Мікеланджэла Мерызі лічыцца рэфарматарам італьянскага жывапісу і стваральнікам барочнай экспрэсіі. Яго творчасць, забытая на некалькі стагоддзяў, была нанова адкрытая толькі ў XX стагоддзі. Палотны Караваджа вылучаюцца дынамічнай кампазіцыяй і майстэрскім выкарыстаннем святла для падкрэслівання фактур і колераў.
