Працэсія ў касцёле ў Нікарагуа. Ілюстрацыйнае фота

СВЕТ

Нікарагуа: новы віток рэпрэсій супраць каталіцкага духавенства

Рэжым Даніэля Артэгі ў Нікарагуа ўзмацняе ціск на Каталіцкі Касцёл, прымушаючы святароў да пастаяннага паліцэйскага нагляду і абмяжоўваючы іх свабоду перамяшчэння.

Аляксандр Амяльчэня - Vatican News

Паводле справаздачы праваабарончай арганізацыі "Christian Solidarity Worldwide", цытаванай парталам "Confidencial", не менш за дзесяць святароў у Нікарагуа апынуліся пад ціскам. Іх абавязалі рэгулярна адпраўляць у паліцыю фотаздымкі і дэталёвыя планы дзейнасці ў сваіх парафіях.

Адзін з пацярпелых, ксёндз Луіс Эдуарда Бенавідэс, сутыкнуўся з нечаканым візітам паліцыі ў сваю плябанію. Яму паведамілі пра новы парадак нагляду, які ўключае ў сябе рэгулярныя допыты і фотафіксацыю. Гэта прывяло да таго, што святар, баючыся арышту, быў вымушаны ўцячы ў суседні Гандурас.

Новыя меры ўключаюць у сябе таксама абмежаванні на перамяшчэнне святароў паміж парафіямі і дэпартаментамі без спецыяльнага дазволу паліцыі. Некаторыя крыніцы паведамляюць нават пра забарону "маліцца за Нікарагуа" і неабходнасць атрымліваць дазвол на правядзенне набажэнстваў.

Гэтыя падзеі з'яўляюцца часткай больш шырокай кампаніі рэпрэсій, якую ўрад Даніэля Артэгі праводзіць супраць Каталіцкага Касцёла, незалежных СМІ і няўрадавых арганізацый. За апошнія гады тысячы НДА былі вымушаныя спыніць сваю дзейнасць, а іх маёмасць была канфіскавана.

Нават міжнародныя арганізацыі не пазбеглі ціску з боку ўладаў. Нядаўна была зачынена прадстаўніцтва Харчовай і сельскагаспадарчай арганізацыі ААН (ФАО) пасля таго, як у яе справаздачы Нікарагуа была названа сярод краін з найбольшым узроўнем голаду. Віцэ-прэзідэнт Расарыё Мурыльё рэзка абвергла гэтую інфармацыю, заявіўшы, што "ў Нікарагуа няма голаду".

Пачатак рэпрэсій супраць Касцёла і грамадзянскай супольнасці датуецца 2018 годам, калі ў краіне пракаціліся масавыя пратэсты супраць урадавай палітыкі. Тады Касцёл адкрыта выступіў на баку пратэстоўцаў, даючы ім прытулак у храмах. З таго часу ціск на Касцёл толькі ўзмацняецца, што прывяло да арыштаў святароў і біскупаў, а таксама да выгнання некаторых манаскіх супольнасцей з краіны.

Новыя меры супраць каталіцкіх святароў могуць разглядацца як чарговы крок у напрамку поўнага падаўлення рэлігійнай свабоды і грамадзянскіх правоў у краіне.