СВЕТ

Кардынал заклікае да свецкай канстытуцыі ў Іраку

Кардынал Луіс Рафаэль Сако, Халдэйскі Патрыярх Багдада, заклікае да прыняцця канцэпцыі грамадзянства і свецкай канстытуцыі для развіцця Ірака і забеспячэння роўнасці ўсіх грамадзян.

Аляксандр Амяльчэня - Vatican News

Іерарх выступіў з важнай заявай аб неабходнасці ўмацавання канцэпцыі грамадзянства, ён падкрэслівае важнасць стварэння палітычна інклюзіўнай дзяржавы.

Дзяржава павінна быць нейтральнай, каб усе адчувалі сябе як дома

"Свецкая дзяржава ўключае ўсе рэлігіі, культуры, групы і мовы, і таму павінна быць нейтральнай, каб усе адчувалі сябе як дома, карыстаючыся аднолькавымі правамі і абавязкамі", - сцвярджае кардынал Сако.

Патрыярх падкрэслівае, што дзяржава павінна грунтавацца на асобе, а не на большасці ці меншасці. Ён вызначае грамадзянства як "прыналежнасць асобы да сваёй краіны, адчуванне сябе яе часткай, валоданне сваёй нацыянальнасцю, карыстанне ўсімі правамі, гарантаванымі дзяржавай, і абавязкамі, якія трэба строга выконваць".

Канцэпцыя грамадзянства – гэта будучыня і развіццё краіны

"Канцэпцыя грамадзянства павінна быць прыменена, бо яна аб'ядноўвае ўсіх і заахвочвае супрацоўніцтва, і на самай справе з'яўляецца будучыняй і развіццём краіны", - падкрэслівае іракскі іерарх.

Ён таксама адзначае важнасць такіх каштоўнасцей, як нацыянальная ідэнтычнасць, шчырасць, сумленнасць і цэласнасць, якія маюць вялікае значэнне для краіны і яе народа. Аднак кардынал выказвае занепакоенасць тым, што некаторыя людзі імкнуцца да асабістых інтарэсаў, якія не маюць нічога агульнага з інтарэсамі Радзімы і парушаюць патрабаванні добрага грамадзянства.

Кардынал Сако заклікае да стварэння "дэмакратычнай дзяржавы з прагрэсіўнай грамадзянскай канстытуцыяй, як у развітых краінах, якая служыць грамадскім інтарэсам". Ён падкрэслівае, што рэлігійная і этнічная дыскрымінацыя супярэчыць прынцыпу дэмакратыі і поўнага грамадзянства.

Канстытуцыя павінна гарантаваць свабоду, годнасць і роўнасць для ўсіх грамадзян

"Канстытуцыя павінна гарантаваць свабоду, годнасць і роўнасць для ўсіх грамадзян, а таксама права на ўдзел у кіраванні дзяржавай і палітычным працэсе", - сцвярджае патрыярх Сако.

Ён таксама прапануе стварыць грамадзянскі дыялог высокага ўзроўню, які ўключае навуковую і юрыдычную экспертызу для перагляду дзеючай Канстытуцыі, запаўнення некаторых прабелаў і змены некаторых артыкулаў.

Патрыярх Халдэйскі заключае сваю заяву, падкрэсліваючы багатую цывілізацыю і культурную спадчыну Ірака, на якую можна абаперціся ў працэсе развіцця краіны.