Каталіцкія біскупы падкрэсліваюць важнасць моцнага ЕС
Аляксандр Амяльчэня - Vatican News
Еўрапейскія біскупы на вясновым Пленарным пасяджэнні COMECE у італьянскім горадзе Нэмі выказалі сваю падтрымку моцнай Еўрапейскай Супольнасці, здольнай абараняць свае інтарэсы ў няпэўныя часы. Іерархі прадстаўлялі епіскапаты 27 краін-чальцоў ЕС.
Свет трапляе ў небяспечную спіраль
У выніковай заяве біскупы адзначылі, што з трывогай назіраюць, як "свет трапляе ў небяспечную спіраль". Прычынамі гэтага яны назвалі глабальныя напружанні, рост ізаляцыянізму і паглыбленне разрываў паміж краінамі. "Такое спалучэнне вядзе да бязлітаснай канкурэнцыі і жорсткай канфрантацыі, часта з грубым парушэннем міжнароднага права", - падкрэслілі іерархі.
Біскупы асабліва адзначылі, што цяперашняя вайна ва Украіне і няпэўнасць, з якой сутыкаецца ўкраінскі народ, "з'яўляецца асабліва трагічным напамінам аб гэтай вельмі трывожнай рэальнасці".
Еўрасаюз павінен заставацца верным сваім прынцыпам
Спасылаючыся на гістарычныя падзеі, у тым ліку 80-годдзе заканчэння Другой сусветнай вайны і 75-годдзе Дэкларацыі Шумана, біскупы заклікалі лідараў натхняцца і кіравацца "нанова духам гэтых гістарычных падзей і каштоўнасцямі, якія ляжалі ў іх аснове". "Гэтыя факты сведчаць пра тое, як дыялог і супрацоўніцтва ў пабудове міру могуць спрыяць адзінству", - падкрэслілі яны.
У дэкларацыі прызнаецца неабходнасць моцнага Еўрасаюза, здольнага да абароны, асабліва ў няпэўныя часы для грамадзян і праграмных каштоўнасцей у Еўропе і нават ва ўсім свеце. Адначасова адзначаецца, што ЕС узнік як "праект міру".
"Неабходныя, прапарцыянальныя і адэкватныя інвестыцыі ў еўрапейскую абарону не павінны ажыццяўляцца за кошт намаганняў па прасоўванні годнасці чалавека, справядлівасці, усебаковага развіцця і клопату пра стварэнне", - падкрэслілі біскупы.
ЕС важна заставацца ключавым лідарам у абароне правоў чалавека
Біскупы выказалі перакананне, што ЕС "застанецца верным сваім асноватворным прынцыпам і будзе працягваць дзейнічаць як аб'яднаная, поўная даверу і інтэгруючая сіла для свайго суседства і для свету".
Яны таксама заклікалі, каб намаганні па павышэнні канкурэнтаздольнасці ЕС не падрывалі гістарычнага абавязацельства Саюза ў галіне салідарнасці, асабліва з найбольш уразлівымі рэгіёнамі свету, а таксама з людзьмі, якія пакутуюць ад беднасці або шукаюць прытулку.
"Гэтыя ініцыятывы не павінны таксама падрываць давер да ЕС як сусветнага лідара ў прасоўванні правоў чалавека, сацыяльнай справядлівасці і ўстойлівага развіцця навакольнага асяроддзя", - падкрэслілі іерархі.
Біскупы выказалі сваю падтрымку моцнаму і салідарнаму Еўрасаюзу, які захоўвае свае асноўныя каштоўнасці і прынцыпы ў складаны для Еўропы і свету час.
