Спадчына пад пагрозай: еўрапейская місія выратавання

Еўрапейская сетка па захаванні рэлігійнай спадчыны распачынае серыю вэбінараў, прысвечаных выратаванню гістарычных святынь, якім пагражае знішчэнне.

Аляксандр Амяльчэня - Vatican News

Новая адукацыйная ініцыятыва Future of Religious Heritage (FRH) накіравана на пошук эфектыўных рашэнняў для выратавання каштоўных рэлігійных аб'ектаў. Праграма складаецца з трох вэбінараў, кожны з якіх прысвечаны аднаму з аб'ектаў са спіса Сямі помнікаў на мяжы знікнення, які быў створаны ў студзені 2013 года арганізацыяй Europa Nostra сумесна з Інстытутам Еўрапейскага інвестыцыйнага банка пры падтрымцы праграмы Europa Creativa.

Першы вэбінар, які адбудзецца 21 лютага 2025 года, будзе прысвечаны касцёлу Санта-Эстэва-дэ-Паўсада ў паўночнай Іспаніі. Гэты старажытны храм XII-XIII стагоддзяў захаваў унікальныя фрэскі XV стагоддзя, але знаходзіцца пад пагрозай разбурэння з прычыны дрэннага тэхнічнага стану і размяшчэння ў малазаселенай мясцовасці.

Дыяцэзіяльнае ўпраўленне па культурнай спадчыне Луга распрацавала праект рэстаўрацыі і аднаўлення святыні. Падчас вэбінара дырэктар дыяцэзіяльнага ўпраўлення Хесус Сальвадор Лопес і рэстаўратар Уксія Агіяр Бальестэрас падзеляцца досведам і прадставяць стратэгіі захавання гэтага ўнікальнага помніка архітэктуры.