Новы прэзідэнт Лівана Жазэф Аун наведаў мараніцкага патрыярха Бешару Раі ў яго рэзідэнцыі ў Бкеркі, на поўначы Бейрута

СВЕТ

Патрыярх маранітаў сустрэўся з новым прэзідэнтам Лівана

Кардынал Бешара Бутрас Раі павіншаваў Жазэфа Ауна з абраннем на пасаду прэзідэнта Лівана і выказаў падтрымку яго праграме па выратаванні краіны.

Аляксандр Амяльчэня - Vatican News

10 студзеня 2025 года ўвечары ў рэзідэнцыі Антыяхійскага патрыярхату мараніцкага абраду ў Бкеркэ адбылася гістарычная сустрэча. Новаабраны прэзідэнт Ліванскай Рэспублікі Жазэф Аун наведаў патрыярха, кардынала Бешару Бутраса Раі.

Падчас гадзіннай сустрэчы кардынал ацаніў інаўгурацыйную прамову Ауна як "дарожную карту выратавання Лівана" і адзначыў шырокую падтрымку, якую атрымаў новы прэзідэнт як у краіне, так і за яе межамі. "Радасць ліванцаў з нагоды гэтага выбару адлюстроўвае іх давер да прэзідэнта і яго пазіцый, асабліва тых, якія ён займаў падчас кіравання арміяй", - падкрэсліў патрыярх.

Генерал Аун падчас сваёй прысягі абвясціў пра "новы этап для краіны" і паабяцаў весці рашучую барацьбу з арганізаванай злачыннасцю, а таксама гарантаваць незалежнасць судовай сістэмы. Ён таксама заявіў пра намер правесці кансультацыі з усімі палітычнымі сіламі для прызначэння новага прэм'ер-міністра.

Асаблівую ўвагу прэзідэнт надаў пытанням бяспекі, падкрэсліўшы, што дзяржава павінна мець "манаполію на зброю", а армія будзе кантраляваць усе межы краіны, уключаючы мяжу з Ізраілем і лагеры палесцінскіх бежанцаў.

Варта адзначыць, што палітычная сістэма Лівана заснавана на канфесійным размеркаванні вышэйшых дзяржаўных пасад: прэзідэнтам заўсёды павінен быць мараніцкі каталік, прэм'ер-міністрам – суніт, а старшынёй парламента – шыіт.

Абранне прэзідэнта пасля больш чым двухгадовага крызісу дае надзею на стабілізацыю палітычнай і грамадскай сітуацыі ў Ліване, які доўгі час знаходзіўся ў стане інстытуцыянальнага паралічу.