У фокусе Папы: войны, хворыя, Халакост і будучыня моладзі
Аляксандр Амяльчэня - Vatican News
Сітуацыя ў Судане, дзе з красавіка 2023 года працягваецца ўзброены канфлікт, застаецца адной з самых драматычных у свеце. Яго наступствы адчувае і суседні Паўднёвы Судан, адзначыў Францішак у сваім звароце да вернікаў.
Неабходна тэрмінова спыніць насілле
"Я заклікаю ваюючыя бакі ў Судане спыніць варожасць і сесці за стол перамоў. Міжнародная супольнасць павінна зрабіць усё магчымае, каб забяспечыць неабходную гуманітарную дапамогу перамешчаным асобам", - падкрэсліў Святы Айцец.
Пантыфік таксама выказаў занепакоенасць сітуацыяй у Калумбіі, дзе ў рэгіёне Кататумба ўзброеныя сутыкненні прывялі да шматлікіх ахвяр сярод мірнага насельніцтва і вымусілі больш за 30 тысяч чалавек пакінуць свае дамы.
Пераадолець стыгму пракажоных
У Сусветны дзень хворых на праказу Папа заахвоціў усіх, хто дапамагае пацярпелым ад гэтай хваробы, працягваць сваю місію і садзейнічаць рэінтэграцыі вылечаных у грамадства. "Яны не павінны быць выключанымі", - падкрэсліў Францішак.
Памяць пра Халакост павінна жыць
Напярэдадні Міжнароднага дня памяці ахвяр Халакосту Папа згадаў пра 80-годдзе вызвалення канцлагера Аўшвіц. Ён асабліва адзначыў венгерскую паэтку Эдзіт Брук, якая жыве ў Рыме і перажыла жахі Халакосту. "Жах знішчэння мільёнаў яўрэяў і людзей іншых веравызнанняў нельга ні забыць, ні адмаўляць", - падкрэсліў Святы Айцец.
Францішак заклікаў усіх супрацоўнічаць у барацьбе з антысемітызмам і любымі формамі рэлігійнай дыскрымінацыі. "Мы павінны выхоўваць моладзь з адкрытым сэрцам да ўсіх, у логіцы братэрства, даравання і міру", - падкрэсліў ён.
Журналісты – апавядальнікі надзеі
На заканчэнне Папа павітаў журналістаў і работнікаў сродкаў масавай інфармацыі, якія ўдзельнічалі ў Юбілейных урачыстасцях, заклікаўшы іх быць "апавядальнікамі надзеі".
Асаблівую радасць выклікала прысутнасць моладзі з Рыма, удзельнікаў Каравана міру, якія падзяліліся сваімі разважаннямі пра прысутнасць Езуса ў іх жыцці і сведчылі аб прыгажосці гасціннасці і братэрства.
