Францішак: хто зарабляе на людскіх пакутах?

Аляксандр Амяльчэня - Vatican News

Святы Айцец пачаў свой заключны зварот з прывітання італьянскіх пілігрымаў, асабліва сясцёр з манаскай кангрэгацыі Дачок Беззаганнай Марыі, якія праводзяць свой надзвычайны капітул. Папа заахвоціў іх даверыцца Божай волі, "якая заўсёды верная нам".

Францішак падзяліўся, што штодня звязваецца з парафіяй у Газе, дзе знаходзяцца 600 чалавек. "Яны былі радыя! Сёння елі сачавіцу з курыцай. У апошні час яны не прывыклі да такой ежы, толькі нейкая гародніна... Яны былі шчаслівыя!", - распавёў Папа.

Святы Айцец выказаў сваю блізкасць жыхарам Лос-Анджэлеса, якія пацярпелі ад разбуральных пажараў. Ён папрасіў заступніцтва Маці Божай Гвадэлупскай за ўсіх жыхароў, каб яны маглі быць сведкамі надзеі праз сілу разнастайнасці і крэатыўнасці.

Папа таксама заклікаў не забываць пра пакутлівую Украіну, Палесціну, Ізраіль і М'янму. "Давайце маліцца за мір! Калі ласка, маліцеся за мір!" - звярнуўся Францішак.

Святы Айцец падкрэсліў, што ў войнах няма сапраўдных пераможцаў, акрамя тых, хто нажываецца на людскіх пакутах. “Хто зарабляе на людскіх пакутах?” - задаў рытарычнае пытанне Францішак. Ён звярнуў увагу на тое, што ў той час як мірныя жыхары пакутуюць ад голаду і разбурэнняў, вытворцы зброі павялічваюць свае прыбыткі.

На заканчэнне прагучалі словы Святога Айца да моладзі, хворых, пажылых людзей і маладажонаў. Ён заахвоціў іх маліцца за адзінства хрысціян і поўную еднасць усіх вучняў Хрыста.