Папскі фонд: заклік да 24-гадзіннай малітвы за мір у М’янме

Аляксандр Амяльчэня - Vatican News

Ініцыятыва прымеркавана да чацвёртай гадавіны ваеннага перавароту ў паўднёва-ўсходняй азіяцкай краіне. Акцыя будзе каардынавацца галоўным офісам у Германіі і 23 нацыянальнымі бюро.

“Мы глыбока ўражаны сітуацыяй у М’янме, - падкрэслівае Рэгіна Лінш, выканаўчы старшыня папскага фонду. - Людзі пакутуюць ад бамбардзіровак, голаду, адсутнасці электрычнасці і беднасці. Святары і манаскія асобы часта вымушаны падарожнічаць некалькі дзён, каб дабрацца да аддаленых супольнасцей, часта рызыкуючы жыццём”.

Дзень малітвы будзе падзелены на змены, каб забяспечыць бесперапыннасць малітвы. Да ініцыятывы могуць далучыцца парафіі, малітоўныя групы і асобныя вернікі.

Арганізацыя таксама апублікавала адмысловую малітву за вернікаў М’янмы, у якой гаворыцца: “Пане міласэрнасці, мы прыносім у малітве да Цябе вернікаў М’янмы: тых, хто жыве ў джунглях і хаваецца ад насілля, і тых, хто быў вымушаны пакінуць свой дом у пошуках бяспекі”.

Зварот да Бога завяршаецца просьбай аб абароне і клопаце пра сем'і, якія чакаюць вяртання сваіх блізкіх, а таксама аб забеспячэнні людзей неабходным для жыцця. “Няхай яны ніколі не адчуваюць сябе пакінутымі, няхай знаходзяць Тваю моц ва ўсіх пакутах”, - гаворыцца ў заключнай частцы малітвы.