Хрысціянскія канфесіі Конга аб'ядналіся за мір

Каталіцкі Касцёл і пратэстанцкія суполкі Дэмакратычнай Рэспублікі Конга прадставілі Грамадскую дамову за мір і суіснаванне. Яны хочуць паспрыяць вырашэнню канфлікту ва ўсходняй частцы краіны.

Аляксандр Амяльчэня - Vatican News

Ініцыятыва, пра якую паведамляе інфармацыйнае агенцтва Fides, накіравана на аднаўленне міру ў багатым на карысныя выкапні рэгіёне, які больш за тры дзесяцігоддзі пакутуе ад насілля і хаосу.

У аснову пакта пакладзена канцэпцыя Bumuntu, якая абапіраецца на традыцыйныя афрыканскія каштоўнасці і прадугледжвае негвалтоўнае вырашэнне канфліктаў. Гэты падыход падкрэслівае важнасць інтэграцыі і сацыяльнага адзінства.

З каталіцкага боку дамову падпісала Канферэнцыя Біскупаў, а з пратэстанцкага – аб'яднанне Царква Хрыста ў Конга (Église du Christ au Congo, ECC), якое ўключае 64 суполкі.

Для рэалізацыі плануецца стварэнне сумесных камісій па міры і грамадскім адзінстве, якія распрацуюць нацыянальную хартыю міру і гармоніі. Канчатковай мэтай з'яўляецца правядзенне Міжнароднай канферэнцыі па міры, сумесным развіцці і суіснаванні ў рэгіёне Вялікіх азёраў.

"Гэта першы крок да доўгачаканага міру ў нашым рэгіёне," - адзначаюць прадстаўнікі касцельных суполак. Яны падкрэсліваюць, што поспех ініцыятывы залежыць ад актыўнага ўдзелу ўсіх бакоў і падтрымкі міжнароднай супольнасці.