Касцёл у Калумбіі гатовы да міратворчай місіі

У Калумбіі працягваюцца сутыкненні паміж партызанскімі групоўкамі, якія прывялі да гібелі амаль 100 чалавек. Каталіцкі Касцёл прапануе сваё пасрэдніцтва ў канфлікце.

Аляксандр Амяльчэня - Vatican News

На паўночным усходзе Калумбіі ў рэгіёне Кататумба разгарнуўся жорсткі канфлікт паміж леварадыкальнымі групоўкамі ELN і FARC, які прывёў да масавага перасялення больш за 11 тысяч мірных жыхароў, паведамляе Каталіцкае інфармацыйнае агенцтва KNA.

"Мы глыбока занепакоены сітуацыяй, якая складваецца ў рэгіёне. Гвалтоўныя дзеянні не толькі парушаюць фундаментальныя правы чалавека, але і пагаршаюць пакуты дзяцей, жанчын і безабаронных людзей", - гаворыцца ў звароце Канферэнцыі Каталіцкіх Біскупаў Калумбіі.

Іерархі выказалі гатоўнасць выступіць пасрэднікамі ў канфлікце і падкрэслілі: "Мы пацвярджаем нашы намаганні супрацоўнічаць з грамадствам дзеля аднаўлення сацыяльнай тканіны і падтрымкі ініцыятыў па згодзе і міру".

Сітуацыя ўскладняецца тым, што рэгіён з'яўляецца адным з найважнейшых месцаў вырошчвання кокі, што робіць яго прывабным для злачынных груповак. Паводле звестак ААН, у ходзе канфлікту былі забітыя два праваабаронцы.

Прэзідэнт Калумбіі Густава Петра, які абвясціў сваю прэзідэнцкую праграму пад лозунгам Paz total (Поўны мір), спрабуе весці перамовы з усімі ўзброенымі групоўкамі. Аднак дасягнутыя пагадненні аб спыненні агню рэгулярна парушаюцца, а партызаны выкарыстоўваюць стрыманасць войска для ўмацавання сваіх пазіцый у рэгіёне.