Хрысціяне пад пагрозай: новая справаздача Open Doors
Аляксандр Амяльчэня - Vatican News
Міжканфесійная дабрачынная арганізацыя апублікавала новы Сусветны індэкс пераследу 2024, які паказвае рост колькасці выпадкаў насілля супраць хрысціян па ўсім свеце.
Становішча хрысціян у многіх рэгіёнах свету застаецца крытычным
За справаздачны перыяд з кастрычніка 2022 па верасень 2023 года было знішчана ці зачынена 14 766 хрысціянскіх будынкаў, а 4 998 хрысціян былі забітыя. Паводле справаздачы, рэальная колькасць выпадкаў значна вышэйшая за афіцыйную статыстыку.
Паўночная Карэя застаецца самай небяспечнай краінай для хрысціян
На першым месцы ў антырэйтынгу краін з самым жорсткім пераследам знаходзіцца Паўночная Карэя, за ёй ідуць Самалі, Лівія, Эрытрэя і Емен. У камуністычнай КНДР, паводле ацэнак Open Doors, каля 200 тысяч палітычных і рэлігійных зняволеных, з якіх ад 50 тысяч да 70 тысяч знаходзяцца ў турмах за хрысціянскую веру.
У Індыі рэзка ўзрасла колькасць забойстваў хрысціян
Паводле справаздачы, у Індыі не менш за 160 хрысціян былі забітыя за сваю веру індуісцкімі нацыяналістамі, што ў дзесяць разоў больш, чым у папярэднім годзе. Толькі ў штаце Маніпур у 2023 годзе было знішчана больш за 400 касцёлаў.
Нікарагуа: сістэматычны пераслед Касцёла
Урад прэзідэнта Артэгі ў Нікарагуа (30-е месца) праводзіць усё больш варожую палітыку ў дачыненні да хрысціян. З мая 2018 па ліпень 2024 года зафіксавана 870 задакументаваных нападаў на Каталіцкі Касцёл. У 2024 годзе рэжым выслаў з краіны 36 духоўных асоб, уключаючы двух біскупаў.
Афрыка – новы эпіцэнтр пераследу
Найбольш драматычная сітуацыя назіраецца ў краінах Афрыкі на поўдзень ад Сахары. У адной толькі Нігерыі было забіта не менш за 4 118 вернікаў. Ісламісцкія групоўкі актыўна дзейнічаюць у Буркіна-Фасо, Малі, Мазамбіку і іншых афрыканскіх краінах.
У краінах Блізкага Усходу працягваецца эміграцыя хрысціянскага насельніцтва з прычыны насілля, эканамічнага крызісу і выгнанняў. Прыводзіцца прыклад паўночнасірыйскага рэгіёна Афрын, дзе турэцкія войскі прымусілі да ўцёкаў усё хрысціянскае насельніцтва.
