Святы Пасад у ААН: лічбавыя тэхналогіі – шлях да развіцця

Арцыбіскуп Этарэ Балестрэра, апостальскі нунцый пры ААН у Жэневе, выступіў на 76-й сесіі Савета па гандлі і развіцці ЮНКТАД з заклікам падтрымаць найменш развітыя краіны.

Аляксандр Амяльчэня - Vatican News

Выступ адбыўся ў кантэксце рэалізацыі Дохінскай праграмы дзеянняў для найменш развітых краін. Прадстаўнік Святога Пасада падкрэсліў неабходнасць умацавання міжнароднай салідарнасці і абнаўлення глабальнага партнёрства для дасягнення ўстойлівага развіцця.

"Людзі з'яўляюцца самым каштоўным рэсурсам найменш развітых краін", - адзначыў арцыбіскуп Балестрэра, спасылаючыся на Дохінскую праграму дзеянняў. Ён падкрэсліў, што любая палітыка ці праграма падтрымкі не павінна абмяжоўвацца толькі эканамічнымі пытаннямі. Цытуючы Папу Францішка, нунцый нагадаў пра неабходнасць прыярытэту інтэгральнага развіцця кожнага чалавека.

Дэлегацыя Святога Пасада станоўча ацаніла намаганні ЮНКТАД у вывучэнні ўплыву эканамічнай і сацыяльнай палітыкі на развіццё беднасці і няроўнасці. Арцыбіскуп звярнуў увагу на праблемы доступу да аховы здароўя і адукацыі, якія істотна ўплываюць на магчымасці найменш развітых краін дасягнуць Мэт устойлівага развіцця.

Асаблівую ўвагу ў сваім выступе ватыканскі дыпламат надаў пытанням лічбавага развіцця. Ён адзначыў, што гэтыя тэхналогіі адкрываюць вялікія магчымасці для структурных пераўтварэнняў і ўстойлівага развіцця. Аднак высокія выдаткі, недахоп навыкаў і інфраструктуры ў найменш развітых краінах перашкаджаюць дасягненню мэты ўсеагульнага і даступнага падключэння да інтэрнэту.