СВЕТ

Піцабала: патрэбны новы падыход да міру на Блізкім Усходзе

Лацінскі Патрыярх Іерусаліма падкрэслівае, што ўсе папярэднія дамоўленасці і ідэі па Блізкім Усходзе страцілі актуальнасць. Патрэбны новы, крэатыўны падыход да вырашэння канфлікту.

Аляксандр Амяльчэня - Vatican News

Цяперашні канфлікт паміж Ізраілем і Хамасам з'яўляецца самым цяжкім перыядам для жыхароў Святой Зямлі за апошнія 35 гадоў, адзначае кардынал П’ербатыста Піцабала ў інтэрв'ю тэлеканалу EWTN. Маштаб насілля, яго ўплыў і эмацыянальнае ўздзеянне на насельніцтва – як на ізраільцян, так і на палесцінцаў, а цяпер і на ліванцаў – набылі велізарныя прапорцыі.

“Ніхто не хоча пашырэння канфлікту, але ніхто не можа яго спыніць”

Пасля ўварвання Хамаса на тэрыторыю Ізраіля 7 кастрычніка 2023 года Ізраіль адказаў маштабнай ваеннай аперацыяй у Сектары Газа, у якую ўцягнуліся таксама Іран і Ліван. На працягу апошняга года Папа Францішак неаднаразова заклікаў да спынення агню і заканчэння вайны ў Святой Зямлі, асабліва пасля нядзельнай малітвы Анёл Панскі і на заканчэнне агульных аўдыенцый па серадах.

Кардынал выказвае глыбокую занепакоенасць не столькі самой вайной, колькі яе доўгатэрміновымі наступствамі. Ён падкрэслівае, што войны заўсёды заканчваюцца, але іх наступствы могуць быць катастрафічнымі для грамадства. Што тычыцца ролі Касцёла ў гэтай сітуацыі, Патрыярх лічыць, што ён павінен заставацца па-за палітычнымі перамовамі.

“Касцёл павінен быць голасам бедных, а не ўдзельнікам палітычных гульняў”

Гуманітарная сітуацыя ў Сектары Газа выклікае асаблівую трывогу. Міжнародная дапамога, якая паступае ў рэгіён, недастатковая для забеспячэння патрэб двух мільёнаў жыхароў. Кардынал Піцабала заклікае хрысціян ва ўсім свеце да малітвы і падтрымкі хрысціянскай супольнасці ў Святой Зямлі.

Асаблівую ўвагу іерарх італьянскага паходжання надае неабходнасці новага падыходу да міру. На яго думку, зараз размова пра мір выглядае нерэалістычнай. Спачатку трэба дамовіцца пра спыненне агню і насілля. Для гэтага патрэбныя новыя палітычныя і рэлігійныя лідары з канструктыўным бачаннем будучыні рэгіёна.

"Мір – гэта не проста пагадненне, гэта стан душы", - падкрэслівае кардынал Піцабала. Ён нагадвае, што "адказам на насілле і зло з'яўляецца крыж", і заклікае ўсіх больш давяраць сіле Божай ласкі. "Евангелле – гэта не ідэя і не аповед, гэта жыццё", - падсумоўвае Лацінскі Патрыярх Іерусаліма.