Размова кардынала Параліна з прэзідэнтам Ірана

12 жніўня 2024 года раніцай Дзяржаўны сакратар Яго Святасці правёў тэлефонную размову з новаабраным прэзідэнтам Ісламскай Рэспублікі Іран Масудам Пезешкіянам.

Аляксандр Амяльчэня - Vatican News

Падчас гутаркі кардынал П’етра Паралін павіншаваў Пезешкіяна з пачаткам яго прэзідэнцкага тэрміну і абмеркаваў пытанні, якія ўяўляюць узаемную цікавасць. Галоўнай тэмай размовы стала сітуацыя на Блізкім Усходзе.

Кардынал выказаў сур'ёзную заклапочанасць Святога Пасада ў сувязі з падзеямі, якія адбываюцца ў рэгіёне. Ён падкрэсліў неабходнасць любымі сродкамі пазбягаць пашырэння цяжкага канфлікту, які цяпер разгортваецца. Замест гэтага, ватыканская дыпламатыя заклікае да дыялогу, перамоў і міру.

Размова падкрэсліла імкненне Святога Пасада да дыпламатычнага ўрэгулявання канфлікту на Блізкім Усходзе і яго ролю ў міжнародных адносінах.