Мігранты на сіцылійскім востраве Лампедуза

СВЕТ

Святы Пасад занепакоены новымі правіламі ЕС па мігрантам

Намеснік сакратара Дыкастэрыі па служэнні інтэгральнаму развіццю чалавека папярэдзіў на Саміце Каталіцкага Касцёла ў Германіі па бежанцам, што краіны ЕС “не павінны падыходзіць да лагераў для бежанцаў як да пастаяннага рашэння”.

Аляксандр Амяльчэня - Vatican News

Айцец Фабіа Баджа, адказны за Секцыю па справах мігрантаў і бежанцаў і спецыяльныя праекты ў ведамстве Святога Пасада падкрэсліў, што асабліва дзеці ніколі не павінны падвяргацца розным формам зняволення, якія часта сустракаюцца ў лагерах для ўцекачоў. Міжнародная супольнасць абавязана гарантаваць захаванне правоў чалавека бежанцаў, якія прыбываюць у Еўропу.

Папа таксама з вялікай увагай сочыць за лёсам тых, хто ўцякае са сваіх краін, працягнуў Баджа. Таму Францішак заклікае да стварэння легальных калідораў для іх у ЕС.

Спецыяльны прадстаўнік па пытаннях бежанцаў у Канферэнцыі Біскупаў Германіі, арцыбіскуп Стэфан Гесэ заклікаў да большай павагі да бежанцаў на іх шляху ў Еўропу. “Кожны чалавек, які прыбывае на знешнія межы ЕС, павінен мець права на справядлівую працэдуру прызнання”, - заявіў ён у Кёльне на пачатку восьмага па ліку штогадовага саміту.

Арцыбіскуп Гамбургскі ў чарговы раз выказаў крытыку запланаванай у Еўрасаюзе рэформы прызнання прытулку GEAS. Калі кампраміс уступіць у сілу, варта асцерагацца, што "гуманітарная прастора для манеўру звузіцца, а не пашырыцца", - растлумачыў ён. Перш за ўсё, гэта тычыцца магчымасці затрымання прыбываючых сем'яў, уключаючы дзяцей, у лагерах на знешніх межах ЕС. “Ніякая мяжа не можа ўзаконіць адмову ў абароне і грэбаванне правамі чалавека”, - падкрэсліў Гесэ, дадаючы, што “палеміка ні да чаго не прывядзе” і “патрэбныя канкрэтныя гуманітарныя рашэнні”.

Пасля шматгадовых дэбатаў Еўрапарламент нядаўна зацвердзіў некалькі адпаведных рэгламентаў і дырэктыву аб Агульнай еўрапейскай сістэме прызнання прытулку (GEAS). Пакет уключае ў сябе больш жорсткія правілы для мігрантаў з краін, якія лічацца адносна бяспечнымі, і накіраваны на аслабленне нагрузкі на краіны асноўнага прыбыцця, такія як Італія і Грэцыя. Чакаецца, што пакет будзе афіцыйна прыняты Саветам міністраў ЕС прыкладна праз два тыдні. Аднак, на думку назіральнікаў, можа прайсці да двух гадоў, перш чым ён уступіць у сілу.