Францішак заклікаў устрымацца ад насілля ў Шры-Ланцы
Аляксандр Панчанка - Vatican News
“Яшчэ раз выказваю сваю блізкасць народу Шры-Ланкі. Дарагія браты і сёстры, я далучаюся да вас у малітве і заклікаю ўсе бакі шукаць мірнага вырашэння цяперашняга крызісу, асабліва дзеля самых бедных, паважаючы правы ўсіх. Я далучаюся да рэлігійных лідараў у просьбе ўстрымацца ад усіх форм насілля і распачаць працэс дыялогу дзеля агульнага дабра”, - сказаў Папа.
Пратэсты ў Шры-Ланцы, выкліканы глыбокім эканамічным крызісам, высокім узроўнем інфляцыі і карупцыяй, пачаліся ў сакавіку 2022 года. Яны хутка перараслі ў масавыя беспарадкі і сутыкненні з паліцыяй. У краіне была ўведзена каменданцкая гадзіна, абмежавана работа сацыяльных сетак. 9 ліпеня маніфестанты захапілі рэзідэнцыю прэзідэнта, які быў вымушаны сысці ў адстаўку і пакінуць краіну. На фоне крызісу і пратэстаў краіна апынулася перад пагрозай гуманітарнай катастрофы.
