Хрысціяне Германіі: палітычная мэта – свет без ядзернай зброі

Напярэдадні 75-й гадавіны бамбардзіроўкі Хірасімы і Нагасакі дзве найбуйнейшыя канфесіі Германіі, каталіцкая і лютэранская, звярнуліся да палітыкаў з просьбай імкнуцца да свету без ядзернай зброі.

“Першым і важным знакам павінна стаць прыняцце і ратыфікацыя Дамовы ААН аб забароне ядзернай зброі – таксама Германіяй”, - гаворыцца ў заяве.

“Погляд на мінулае – гэта папярэджанне для сучаснасці і будучыні”, - падкрэслілі аўтары. Яны лічаць гэта асабліва актуальным у сітуацыі, калі “адбываецца фатальная дэрэгуляцыя міжнародных пагадненняў па ядзернай зброі і ваеннай палітыцы”. Ва ўмовах сусветнага крызісу міжнародных адносін узрастае небяспека эскалацыі ядзернага насілля.

“Гэтыя праблемы ўзмацняюцца намаганнямі па мадэрнізацыі існуючых сістэм ядзернай зброі з мэтай захаваць іх аператыўны патэнцыял або адаптаваць да зменлівых сцэнарыяў пагроз”

, - гаворыцца ў звароце нямецкіх Цэркваў.

Але новыя пагрозы, такія як кібер- і гандлёвыя войны, тэрарызм прынцыпова ставяць пад сумнеў стратэгічнае значэнне сістэм ядзернай зброі.

Падпісанты нагадалі, што каталіцкай і пратэстанцкай канфесіям заўсёды было зразумела, што выкарыстанне ядзернай зброі масавага знішчэння не можа быць этычна апраўданым.

Аўтары заявы патрабуюць, каб палітычнай мэтай быў свет без ядзернай зброі.