Пантыфік правёў тэлефонную размову з Прэзідэнтам Славакіі

Святы Айцец папрасіў лідара краіны перадаць прывітанне ўсім жыхарам Славакіі і папрасіць іх, сутыкнуўшыся з наступствамі пандэміі, не страціць надзеі і адвагі, заставацца дысцыплінаванымі, “паколькі толькі разам мы зможам перамагчы”, - паведаміла Чапутава ў відэа, апублікаваным канцылярыяй Прэзідэнта ў Браціславе. Асаблівым чынам Папа заклікаў славакаў клапаціцца пра пажылых людзей, таму што яны “наша памяць”.

Пантыфік паведаміў, што ён здаровы і спрабуе “дастукацца” да вернікаў праз сродкі масавай інфармацыі. Францішак лічыць важным, каб “пасланне надзеі было пачута і ў гэты час”.

Па словах Чапутавай, матывам для тэлефоннай размовы стала яе запланаваная на чэрвень аўдыенцыя ў Ватыкане, якая хутчэй за ўсё будзе перанесена. Прэзідэнт Славакіі выказала радасць, што прынамсі такім чынам змагла падзякаваць Папу за яго словы падтрымкі і надзеі.