Леў XIV прыняў на аўдыенцыі амерыканскую спявачку Паці Сміт
Аляксандр Панчанка - Vatican News
“Гэта была доўгая аўдыенцыя, якая больш нагадвала размову двух людзей, што адкрываюць адзін у адным старых сяброў і дзеляцца ўспамінамі, звязанымі са словамі і музыкай, марамі, бачаннямі і надзеямі мінулага і сучаснасці”, - пракаментаваў сустрэчу ксёндз Антоніа Спадара, падсакратар Дыкастэрыі па справах культуры і адукацыі, які суправаджаў Паці Сміт падчас яе візіту ў Ватыкан.
Паці Сміт, якую называюць “хроснай маці панк-року”, актыўна падтрымлівае культурныя ініцыятывы Святога Пасада. 8 мая 2026 года, у першую гадавіну абрання Льва XIV Папам, яна выканала малітву падчас цырымоніі адкрыцця павільёна Апостальскай Сталіцы на 61-й Міжнароднай мастацкай выставе Венецыянскай біенале.
У 2013 годзе спявачка сустрэлася з Папам Францішкам, а годам пазней брала ўдзел у дабрачынным Калядным канцэрце ў Рыме, арганізаваным Святым Пасадам, падчас якога выканала некалькі твораў.
Праз некалькі дзён пасля смерці Францішка Паці Сміт у інтэрв’ю ватыканскім СМІ сказала: “Мы павінны прыняць словы, якія былі яму асабліва дарагімі, – лю боў, пакора, спачуванне, – прыняць іх, паверыць у іх сваім сэрцам і старацца, як некаторыя нашы вялікія настаўнікі, наследаваць Хрыста, наследаваць Францішка. Бо калі мы іх наследуем, мы становімся значна бліжэйшымі да Бога”.
