Леў XIV прызначыў новага біскупа Караганды
Аляксандр Амяльчэня - Vatican News
10 жніўня 2026 года Святы Пасад паведаміў пра прызначэнне новага біскупа Караганды ў Казахстане. Ім стаў ксёндз Пётр Пытлаваны – святар “fidei donum” Пшэмысльскай архідыяцэзіі ў Польшчы.
Новы біскуп нарадзіўся ў польскім Бжозаве. Пасля заканчэння школы ён паступіў у Вышэйшую духоўную семінарыю ў Пшэмыслі, а пазней вывучаў тэалогію ў Люблінскім каталіцкім універсітэце імя Яна Паўла ІІ. Свае навуковыя даследаванні ён працягнуў у Кракаве, дзе атрымаў ступень доктара тэалогіі.
Неўзабаве пасля святарскага пасвячэння ксёндз Пытлаваны як святар “fidei donum” быў накіраваны на місійнае служэнне ў Казахстан. Тут ён быў пробашчам некалькіх парафій, а таксама прэфектам і рэктарам Міждыяцэзіяльнай духоўнай семінарыі ў Карагандзе.
Акрамя душпастырскага служэння, ён выконваў абавязкі прэс-сакратара Канферэнцыі Каталіцкіх Біскупаў Цэнтральнай Азіі. Да прызначэння біскупам быў пробашчам катэдральнай парафіі Маці Божай Нястомнай Дапамогі ў Астане.
