Леў XIV нагадае пра ўплыў войнаў на пагаршэнне экалогіі
Аляксандр Панчанка – Vatican News
Дыкастэрыя па служэнні інтэгральнаму развіццю чалавека патлумачыла ў адмысловым паведамленні, апублікаваным 2 чэрвеня 2026 года, што “пасланне Святога Айца падкрэслівае сувязь паміж узброенымі канфліктамі і пагаршэннем стану навакольнага асяроддзя”.
“Такое пагаршэнне, з аднаго боку, з’яўляецца сур’ёзным парушэннем нашага абавязку клапаціцца пра стварэнне, а з другога – доўгатэрміновай пагрозай для жыцця сотняў мільёнаў людзей. Шырока распаўсюджанае сёння ўсведамленне шматлікіх сувязей паміж вайной і прыроднымі рэсурсамі не прывяло ні да стварэння адпаведных інстытутаў, ні да прыняцця адказных рашэнняў, накіраваных на прадухіленне канфліктаў і мірнае вырашэнне спрэчак”, – падкрэсліваецца ў ватыканскім камюніке.
Такім чынам, тэма папскага паслання, якім стане “бачанне Ісаі, што прарочыць пераўтварэнне зброі ў сельскагаспадарчыя прылады”, выразна “заклікае аддаваць перавагу развіццю і ўстойлівасці, а не гвалту і руйнаванню”.
