Папа абнавіў Статут Камісіі па абароне непаўналетніх

Марыя Валодзіна - Vatican News

Зала друку Святога Пасада апублікавала 13 чэрвеня 2026 года абноўлены Статут Папскай камісіі па абароне непаўналетніх, які Леў XIV зацвердзіў “ad experimentum” на трохгадовы выпрабавальны тэрмін. Папярэдні Статут быў створаны ў 2015 годзе. Пасля прыняцця ў сакавіку 2022 года апостальскай канстытуцыі “Praedicate Evangelium”, якая рэгулюе працу Рымскай курыі, узнікла неабходнасць прывесці Статут Камісіі ў адпаведнасць з яе абноўленымі мандатам і структурай.

Абарона непаўналетніх — прыярытэт Касцёла

“Статут стане важным крокам у паглыбленні нашай сумеснай адказнасці за абарону найбольш безабаронных і клопат пра іх. Ён адлюстроўвае досвед, набыты падчас слухання ахвяр і пацярпелых, меркаванні экспертаў у сферы бяспекі непаўналетніх, а таксама практыку мясцовых Касцёлаў, яшчэ раз пацвярджаючы, што абарона непаўналетніх застаецца адным з галоўных прыярытэтаў”, — падкрэсліў старшыня Камісіі, арцыбіскуп Тыбо Верні.

Новы Статут узмацняе ролю Камісіі ў прасоўванні практыкі абароны непаўналетніх ва ўсім Касцёле і ўдакладняе яе мандат, структуру і аператыўныя метады. Гэтае абнаўленне з’яўляецца часткай больш шырокіх намаганняў Святога Пасада, скіраваных на тое, каб абарона непаўналетніх была цалкам інтэграваная ў жыццё і структуры Касцёла.

Падыход, заснаваны на слуханні пацярпелых

Фундаментальны прынцып новага Статута — пастаянная ўвага да падыходаў, заснаваных на слуханні ахвяр і пацярпелых. Таксама ўдакладняюцца адносіны Камісіі з іншымі ватыканскімі Дыкастэрыямі і ўзмацняецца яе роля ў прасоўванні адказнасці, празрыстасці і перадавога вопыту абароны непаўналетніх на глабальным узроўні. Леў XIV неаднаразова сцвярджаў, што абарона безабаронных з’яўляецца фундаментальным абавязкам Касцёла. Абноўлены Статут пацвярджае гэтае абавязацельства.

Прававы статус Камісіі

Першыя артыкулы Статута вызначаюць прававы статус Камісіі, як кансультатыўнага органа, які кансультуе Святога Айца па пытаннях абароны непаўналетніх і падпарадкоўваецца непасрэдна яму. Камісія дзейнічае пры Дыкастэрыі веравучэння і цесна супрацоўнічае з ёй у тым, што тычыцца абмену інфармацыяй, распрацоўкі метадалогій, падрыхтоўкі штогадовай справаздачы і адукацыйных праграм. Старшыня або сакратар Камісіі служаць у Дыкастэрыі веравучэння, а адзін або некалькі супрацоўнікаў Дыкастэрыі прызначаюцца назіральнікамі на пленарныя асамблеі Камісіі.

Сфера кампетэнцыі Камісіі

Камісія дапамагае мясцовым Касцёлам у распрацоўцы стабільных і даступных сістэм паведамлення аб парушэннях, а таксама цэнтраў слухання на рэгіянальным і нацыянальным узроўнях, якія прымаюць, слухаюць і суправаджаюць ахвяр і пацярпелых, адначасова абараняючы канфідэнцыйнасць, асабістыя даныя і правы кожнага. Камісія можа прымаць удзел у візітах “ad limina” у супрацоўніцтве з Дыкастэрыяй веравучэння. Яна таксама падтрымлівае інстытуты кансэкраванага жыцця праз супрацоўніцтва з канферэнцыямі вышэйшых настаяцеляў.

Штогадовая справаздача

На Камісію ўскладаецца абавязак рыхтаваць штогадовую справаздачу аб абароне непаўналетніх у Паўсюдным Касцёле. Справаздача складаецца з удзелам Дыкастэрый Рымскай курыі і мясцовых касцёльных органаў. Пасля кансультацый у Дзяржаўным сакратарыяце дакумент прадстаўляецца Святому Айцу для атрымання дазволу на публікацыю.

Супрацоўніцтва з Рымскай курыяй

Камісія супрацоўнічае з Дыкастэрыямі Рымскай курыі ў пытаннях абароны непаўналетніх, і можа, па ўзгадненні з Дзяржаўным сакратарыятам, накіроўваць рэкамендацыі прэфектам Дыкастэрый. У выпадку паўторных парушэнняў або сур’ёзных недахопаў у мясцовых сістэмах абароны непаўналетніх, Камісія можа напрамую накіроўваць рэкамендацыі кампетэнтнай Дыкастэрыі, якая захоўвае за сабой права прымаць рашэнні згодна са сваім мандатам.

Універсальныя рамкі абароны непаўналетніх

Камісія прасоўвае агульную сістэму прынцыпаў абароны непаўналетніх: мясцовыя кіруючыя прынцыпы павінны адпавядаць указанням Святога Пасада. Гэтыя прынцыпы вызначаюцца і рэалізуюцца на мясцовым узроўні з улікам спецыфікі розных кантэкстаў і дзеючага грамадзянскага заканадаўства.

Склад Камісіі

У склад Камісіі ўваходзяць не больш за 23 члена, якія прызначаюцца Папам. Старшыню Камісіі таксама прызначае Пантыфік. Старшыні дапамагае сакратар, які ўваходзіць у склад Камісіі. Камісія збіраецца два разы на год на пленарную асамблею і дзейнічае калегіяльна пад кіраўніцтвам старшыні. Яна ўключае рэгіянальныя і даследчыя групы. Старшыні і сакратару дапамагае і дае парады выканаўчая рада — орган, у склад якога ўваходзяць самі старшыня і сакратар, а таксама тры камісары, абраныя з ліку членаў Камісіі і супрацоўнікаў Святога Пасада, якія служаць у ёй. Выканаўчая рада можа таксама карыстацца паслугамі двух знешніх членаў, якія з’яўляюцца экспертамі ў фінансавых і адміністрацыйных пытаннях. Нарэшце, для выканання сваёй місіі Камісія можа запрашаць рэгіянальных кансультантаў. З поўным тэкстам абноўленага Статута можна азнаёміцца на сайце: press.vatican.va.