Папа дзякуе манарху і католікам Іспаніі пасля свайго візіту
Аляксандр Амяльчэня - Vatican News
Звяртаючыся да шматлікіх пілігрымаў, сабраных на Плошчы Святога Пятра, Леў XIV найперш засяродзіўся на духоўным выніку свайго візіту. "Выказваю найперш маю ўдзячнасць Богу за апостальскае падарожжа, якое Ён дазволіў мне здзейсніць у Іспанію", - сказаў ён.
Пантыфік асабліва адзначыў прыём з боку мясцовых жыхароў, адданых сваёй традыцыі. "Дзякую іспанскаму народу, які прыняў мяне з вялікім энтузіязмам і пабожнасцю", - дадаў ён.
Асобныя словы былі адрасаваны манарху і духавенству краіны, якія прымалі ўдзел у арганізацыі падзей. "Асабліва ўдзячны Яго Вялікасці Каралю; з любоўю дзякую біскупам, усім супольнасцям, якія я наведаў, і ўсяму Касцёлу, які знаходзіцца ў Іспаніі", - прамовіў Святы Айцец. Свой зварот Пантыфік завяршыў благаслаўленнем на мове краіны: "Няхай Бог заўсёды благаслаўляе Іспанію!".
Апостальскі візіт Льва XIV на Пірэнейскі паўвостраў і Канарскі архіпелаг праходзіў з 6 па 12 чэрвеня 2026 года. За гэтыя дні Папа наведаў Мадрыд, Барселону, Гран-Канарыю і Тэнэрыфэ. Геаграфія паездкі ахапіла як кантынентальную частку, так і астраўныя тэрыторыі. Вернікі паўсюль сустракалі Пантыфіка з адкрытасцю.
Праграма гэтага падарожжа была надзвычай насычанай рознымі сустрэчамі. Пантыфік меў размовы з каралеўскай сям'ёй, кіраўніцтвам краіны, парламентарыямі, іерархіяй і моладдзю. Ён наведаў сацыяльныя структуры, дабрачынныя арганізацыі і пенітэнцыярную ўстанову. Таксама Святы Айцец маліўся на Ружанцы ў кляштары на гары Мансэрат. На заканчэнне візіту Папа ўзначаліў адкрыццё самай высокай у свеце касцельнай "Вежы Езуса Хрыста" ў барселонскай базіліцы Святой Сям'і.
