Святы Айцец падтрымаў брытанскіх бацькоў, якія страцілі дзіця
Аляксандр Амяльчэня - Vatican News
Дзяржаўны сакратар Яго Святасці кардынал П'етра Паралін перадаў арцыбіскупу Джону Шэрынгтану, адказнаму за пытанні жыцця ў Канферэнцыі Біскупаў Англіі і Уэльса, словы падтрымкі ад Святога Айца.
Гэтае прывітанне прымеркавана да “Дня жыцця”, які католікі Англіі, Уэльса, Шатландыі і Ірландыі будуць адзначаць у нядзелю 21 чэрвеня 2026 года.
Папа выказвае радасць з нагоды абранай тэмы, прысвечанай цуду поўнай чалавечнасці дзіцяці ва ўлонні маці. Ён таксама адзначае намаганні касцельнай супольнасці па падтрымцы маці і бацькоў, якія сутыкнуліся са стратай немаўляці.
Асаблівую малітоўную ўвагу Пантыфік удзяляе бацькам, якія смуткуюць пасля трагічнай смерці дзіцяці. Ён просіць, каб яны знайшлі суцяшэнне і спакой у спазнанні Божай любові, "бо для Яго ўсе жывыя". Святы Айцец выказаў спадзяванне на тое, што гэтыя маці і бацькі знойдуць неабходную падтрымку ў касцельнай супольнасці. На яго думку, асаблівай апораю павінна стаць жыццё, напоўненае малітвай і сакрамэнтамі.
Кожнае чалавечае жыццё мае бясконцую годнасць ад моманту зачацця
У пасланні згадваецца нядаўняя энцыкліка Льва XIV "Magnifica humanitas". У ёй Папа нагадвае, што кожная чалавечая істота надзелена бязмежнай годнасцю проста ў сілу існавання, таго, што яна была пажадана, створана і палюблена Богам" Гэтая боская любоў напаўняе сэнсам усё існаванне чалавека. Яна не заканчваецца са смерцю, але запрашае нас да новай паўнаты ў вечнасці.
Дзякуючы за трывалае сведчанне пра цудоўны дар жыцця ва ўсёй яго велічы, Святы Айцец удзяліў усім удзельнікам святкавання апостальскае благаслаўленне.
Сёлета “Дзень жыцця” ў Брытаніі адзначаецца пад агульнай тэмай "Цуд дзіцяці ва ўлонні маці". Ён прысвечаны паглыбленню ўсведамлення сэнсу і каштоўнасці чалавечага жыцця на кожным этапе і ў любых умовах.
На інтэрнэт-старонцы брытанскай біскупскай канферэнцыі даступныя рэсурсы для дапамогі парафіям і вернікам. Сродкі для падтрымкі касцельнай працы ў абарону жыцця можна будзе перадаць праз адмысловы збор у нядзелю або праз анлайн-ахвяраванне.
