Сядзіба Папскай акадэміі сацыяльных навук у Ватыканскіх садах

Папа

Слова Папы да ватыканскіх акадэмікаў: легітымнасць улады і мір

Леў XIV накіраваў пасланне ўдзельнікам пленарнай сесіі Папскай акадэміі сацыяльных навук, прысвечанай легітымнасці ўлады, дэмакратыі і рэфармаванню сусветнага парадку.

Аляксандр Амяльчэня - Vatican News

У сваім звароце Святы Айцец падзякаваў канцлеру акадэміі кардыналу Пітэру Тарксану і старшыні сястры Хелен Алфард за выбар тэмы, якая з’яўляецца надзвычай актуальнай у часы глыбокіх глабальных змен. Паводле Пантыфіка, каталіцкае сацыяльнае вучэнне разглядае ўладу не як самамэту, а як сродак, скіраваны на дасягненне агульнага дабра.

Сапраўдная легітымнасць улады грунтуецца на мудрасці і маральных цнотах, а не на эканамічнай ці тэхналагічнай моцы.

Святы Айцец падкрэсліў, што мудрасць дазваляе адрозніваць сапраўднае дабро ад марнаслаўя. У ажыццяўленні ўлады важную ролю адыгрываюць справядлівасць, мужнасць і стрыманасць. Апошняя, як заўважыў Папа, служыць надзейнай абаронай ад злоўжыванняў і празмернага самаўзвышэння.

Гаворачы пра дэмакратыю, Леў XIV адзначыў, што яна павінна быць не проста фармальнай працэдурай, а прызнаннем годнасці кожнага чалавека. Спасылаючыся на энцыкліку святога Яна Паўла II “Centesimus Annus”, ён нагадаў, што Касцёл шануе дэмакратычную сістэму за магчымасць удзелу грамадзян у палітычным выбары і падсправаздачнасць тых, хто кіруе. Аднак здароўе дэмакратыі залежыць ад яе каранёў у маральным законе. Без гэтага яна рызыкуе ператварыцца ў тыранію большасці або шырму для панавання эліт.

Канцэнтрацыя ваеннай і эканамічнай сілы ў адных руках пагражае міжнароднай згодзе.

Пантыфік звярнуў увагу на тое, што прынцыпы справядлівасці павінны вызначаць і міжнародны парадак. Стабільнасць у свеце не можа будавацца выключна на балансе сіл або тэхнакратычнай логіцы. Леў XIV заклікаў да “лепшага тыпу палітыкі”, пра якую пісаў Папа Францішак у “Fratelli tutti”, і падкрэсліў неабходнасць адважнага пераасэнсавання мадальнасці міжнароднага супрацоўніцтва.

У завяршэнні паслання Папа нагадаў, што Божая ўсемагутнасць выяўляецца ў міласэрнасці. Менавіта логіка любові павінна адушаўляць гісторыю, ператвараючы “зямны горад” у правобраз “Горада Божага”.

Сапраўдны мір, чарговы раз заўважыў Пантыфік, – гэта не простая адсутнасць канфліктаў, а плён справядлівасці і ўлады, пастаўленай на службу кожнаму чалавеку.