Трэці “Фестываль Уваскрасення” на плошчы Сібелес у Мадрыдзе, Іспанія

Папа

Папа: жыццё хрысціян павінна стаць канцэртам еднасці

Леў XIV заклікаў вернікаў дазволіць Уваскрасенню Хрыста змяніць іх жыццё, каб яно стала адважным сведчаннем веры, здольным пераадолець духоўную пасрэднасць у свеце.

Аляксандр Амяльчэня - Vatican News

Святы Айцец звярнуўся да ўдзельнікаў 4-га “Фестывалю Уваскрасення” з гарачым прывітаннем на заканчэнне актавы Вялікадня. Ён падкрэсліў, што ўпэўненасць у паўстанні Хрыста з мёртвых не з’яўляецца выключна гістарычнай згадкай, але ўяўляе сабой жывую сілу, здольную аднавіць чалавечыя сэрцы і напоўніць сучасны свет евангельскай радасцю.

Паводле слоў Пантыфіка, сапраўдная вера надае глыбокі сэнс кожнаму праяўленню чалавечага шчасця, паступова ўзвышаючы яго да сапраўднай паўнаты.

Велікодная радасць павінна выйсці за межы храмаў і прасякнуць штодзённасць

У сваім пасланні Леў XIV спаслаўся на ўражваючы фрагмент з Евангелля паводле Мацвея, дзе гаворыцца пра паўстанне святых з магіл пасля Уваскрасення Пана. Гэтая біблейская выява служыць напамінам аб тым, што Пасха не павінна заставацца закрытай у мінулым; яна заклікана ўрывацца ў гарады і ўваходзіць у паўсядзённасць праз учынкі людзей.

Папа заклікаў натхняцца прыкладам вернікаў, якія ў мінулым сталі мучанікамі і сведкамі Езуса, ператварыўшы перамогу Хрыста над смерцю ў асабістую вернасць і ахвярнасць.

Святы Айцец звярнуў асаблівую ўвагу на ролю моладзі і мясцовых супольнасцей у справе евангелізацыі. Ён адзначыў, што свету патрэбныя хрысціяне, якія не саромеюцца Евангелля і здольныя зрабіць прысутнасць Бога бачнай ва ўсіх сферах грамадскай дзейнасці.

Папа падкрэсліў, што абвяшчэнне веры нараджаецца не з прадуманых гуманітарных стратэгій, а выключна з тых сэрцаў, якія былі радыкальна пераменены Уваскрослым Панам.

Жыццё хрысціян заклікана стаць грандыёзным канцэртам адзінства і любові

Леў XIV выказаў пажаданне, каб святкаванне Уваскрасення напоўніла ўвесь свет шчырымі спевамі, а само існаванне хрысціян ператварылася ў вялікую гармонію веры і міласэрнасці. Ён заклікаў, каб агонь велікоднай свечкі выйшаў за сцены Касцёлаў і знішчыў усялякую ўнутраную абыякавасць, духоўную самазаспакоенасць і пасрэднасць. Хрыстус жывы, і таму, як піша Пантыфік, нішто ў чалавечай прыродзе больш не асуджана на вечную цемру граху.

На заканчэнне паслання Святы Айцец заклікаў вернікаў не задавальняцца жыццёвым мінімумам і заўсёды шукаць сапраўднай сустрэчы з Хрыстом. Ён пацвердзіў свой намер сустрэцца з удзельнікамі форуму ў чэрвені 2026 года на плошчы Сібелес у Мадрыдзе, заахвочваючы іх зрабіць кожнае сваё імкненне новым спевам, які будзе няспынна несці святло Уваскрослага ўсім народам.