Леў XIV прыняў караля і каралеву Іспаніі
Аляксандр Амяльчэня - Vatican News
Пасля сустрэчы з Пантыфікам іспанскія манархі правялі перамовы з Дзяржаўным сакратаром Яго Святасці кардыналам П’етра Паралінам і арцыбіскупам Полам Рычардам Галахерам, сакратаром па адносінах з дзяржавамі і міжнароднымі арганізацыямі.
Як паведамляецца ў афіцыйнай заяве Залы Друку Святога Пасада, падчас сустрэчы бакі выказалі задавальненне добрымі адносінамі паміж Святым Пасадам і Іспаніяй.
Асобная ўвага была нададзена будучаму апостальскаму падарожжу Льва XIV у Іспанію, якое стане значным момантам для двухбаковых стасункаў. У гэтым кантэксце ўдзельнікі сустрэчы абмеркавалі шэраг актуальных пытанняў, што тычацца сітуацыі ў краіне, а таксама закранулі тэму місіі Касцёла ў сучасным грамадстве.
Дыялог завяршыўся разглядам тэм рэгіянальнага і міжнароднага характару. Бакі падкрэслілі важнасць няспынных намаганняў у падтрымку міру і неабходнасць умацавання прынцыпаў і каштоўнасцей, якія з’яўляюцца падмуркам міжнароднага суіснавання.
