Салідарнасць і чаканне: Леў XIV пра Бразілію і Камерун
Аляксандр Амяльчэня – Vatican News
Пасля малітвы "Анёл Панскі" Леў XIV скіраваў свае думкі да жыхароў бразільскага штата Мінас-Жэрайс, які сутыкнуўся з разбуральнымі наступствамі маштабных паводак. Пантыфік запэўніў у сваёй малітве за ўсіх загінулых і тых, хто ў выніку стыхіі застаўся без даху над галавой, падкрэсліваючы важнасць узаемадапамогі ў такія хвіліны.
Асобныя словы падзякі прагучалі ў адрас ратавальнікаў і ўсіх, хто задзейнічаны ў аперацыях па аказанні дапамогі пацярпелым. Гэты жэст салідарнасці стаў чарговым напамінам пра нястомны клопат Касцёла пра людзей, якія апынуліся ў складаных жыццёвых абставінах.
Асаблівую атмасферу на плошчы Святога Пятра стварыла прысутнасць групы камерунцаў, якія пражываюць у Рыме. Іх суправаджаў старшыня епіскапату гэтай афрыканскай краіны. Вітаючы іх, Леў XIV згадаў пра сваё будучае падарожжа, якое чакаецца ўжо ў наступным месяцы.
"Калі будзе на тое Божая воля, я буду мець радасць наведаць вашу краіну ў красавіку", - адзначыў Папа, звяртаючыся да камерунскіх вернікаў. Гэтыя словы пацвердзілі нязменнасць планаў на апостальскае падарожжа, якая закліканая ўмацаваць мясцовы Касцёл і падтрымаць дух вернікаў на афрыканскім кантыненце.
Сярод пілігрымаў, якія сабраліся ў Ватыкане, былі прадстаўнікі розных краін. Пантыфік прывітаў групы з Румыніі, Славакіі, Іспаніі і Злучаных Штатаў Амерыкі. Не засталіся без увагі і італьянскія вернікі, у тым ліку скаўты і моладзь, якая нядаўна прыняла сакрамэнт бежмавання. Завяршаючы сустрэчу, Леў XIV пажадаў усім прысутным добрай нядзелі.
