Новы нунцый у Сірыі: Папа прызначыў арцыбіскупа Кона
Арцыбіскуп Луіджы Раберта Кона стаў новым апостальскім нунцыем у Сірыі, змяніўшы кардынала Дзэнары, які займаў гэтую пасаду 17 гадоў.
Аляксандр Амяльчэня - Vatican News
Леў XIV прызначыў 19 сакавіка 2026 года арцыбіскупа Луіджы Раберта Кона апостальскім нунцыем у Сірыі. Да гэтага часу ён з'яўляўся папскім прадстаўніком у Сальвадоры, куды быў накіраваны ў 2022 годзе. Раней арцыбіскуп Кона займаў пасаду асэсара па агульных справах Дзяржаўнага сакратарыяту. Ён носіць тытул тытулярнага арцыбіскупа Сала Кансіліна.
Кардынал Дзэнары пакінуў пасаду ў лютым 2026 года, падаўшы Пантыфіку прашэнне аб адстаўцы ў сувязі з дасягненнем узроставай мяжы. За гэты час ён стаў сапраўдным сімвалам касцельнай прысутнасці ў ахопленай вайной краіне – Папа Францішак нават прадоўжыў яго паўнамоцтвы звыш звычайнага тэрміну.
20 сакавіка 2026, 06:32
