Папа

Малітва і салідарнасць: словы Папы пасля аўдыенцыі

Звяртаючыся да вернікаў на завяршэнне агульнай аўдыенцыі, Леў XIV заклікаў іх заставацца людзьмі міру і праяўляць творчы падыход у справах міласэрнасці.

Аляксандр Амяльчэня - Vatican News

На заканчэнне сустрэчы з вернікамі 18 сакавіка 2026 года Пантыфік звярнуўся з асаблівымі словамі да розных моўных груп, засяродзіўшыся на ролі хрысціян у сучасным грамадстве.

Вітаючы арабскамоўных пілігрымаў, асабліва тых, хто прыбыў з Блізкага Усходу, Папа нагадаў аб высокім пакліканні верніка быць “прыладай міру, любові і згоды”. Паводле яго слоў, менавіта праз такое сведчанне сапраўдны мір можа запанаваць сярод усіх народаў.

Сапраўдны мір патрабуе ад кожнага хрысціяніна быць актыўным дзеячам згоды ў свеце.

Звяртаючыся да вернікаў з Польшчы, Леў XIV адзначыў, што час Вялікага посту з’яўляецца асаблівай нагодай для выяўлення веры праз “творчую міласэрнасць”. Ён заахвоціў парафіяльныя супольнасці і дабрачынныя арганізацыі, такія як “Caritas”, актыўна практыкаваць міласціну і ўчынкі міласэрнасці для душы і цела, каб дапамагаць патрабуючым.

Асаблівае пасланне Пантыфік накіраваў і кітайскамоўным хрысціянам. Ён заклікаў іх нястомна будаваць сваё жыццё на хрысціянскіх каштоўнасцях, каб заставацца эфектыўнай “прыладай міру ў грамадстве”. Папа падкрэсліў, што вернасць Евангеллю павінна выяўляцца ў канкрэтных учынках пакаяння і любові да бліжняга.

Сведчанне веры ў штодзённым жыцці ператварае добрыя справы ў духоўную ахвяру, прыемную Богу.

Напярэдадні літургічнай урачыстасці святога Юзафа, Папа даручыў намеры і памкненні ўсіх прысутных на Плошчы Святога Пятра гэтаму нябеснаму апекуну Касцёла.

Леў XIV таксама ўдзяліў сваё адмысловае благаслаўленне хворым, моладзі і маладажонам, заклікаючы ўсіх быць годнымі і паслядоўнымі сведкамі Уваскрослага Хрыста.