Ад маладых да хворых: Леў XIV сустрэўся з жыхарамі Остыі
Аляксандр Амяльчэня - Vatican News
Звяртаючыся да душпастырскай рады, Святы Айцец засяродзіўся на мадэлі Касцёла як супольнасці, якая слухае. Ён падкрэсліў, што галоўнай задачай рады з’яўляецца не столькі арганізацыя мерапрыемстваў, колькі стварэнне атмасферы “сямейнага дому”, дзе кожны вернік адчувае сябе прынятым. Папа заклікаў пазбягаць бюракратызму і заўсёды шукаць тых, хто з розных прычын апынуўся па-за межамі парафіяльнага жыцця.
У размове з моладдзю Остыі Леў XIV зрабіў акцэнт на пераадоленні страху перад невядомасцю. Ён адзначыў, што сучасны свет патрабуе ад маладых хрысціян быць не “гледачамі з балкона”, а актыўнымі ўдзельнікамі грамадскага і духоўнага адраджэння.
Паводле слоў Пантыфіка, мары моладзі – гэта мова, на якой Бог прамаўляе да будучыні, таму іх трэба рэалізоўваць з адвагай. Ён нагадаў маладым італьянцам, што іх вера здольная стаць рухавіком для сапраўдных перамен у грамадстве.
Сустрэча з хворымі і асобамі сталага веку прайшла ў атмасферы глыбокай чалавечай блізкасці. Леў XIV падкрэсліў, што абмежаванасць фізічных сіл не змяншае каштоўнасці чалавека, а наадварот, робіць яго сведкам сутнасці жыцця. Ён назваў іх малітву “нябачнай сеткай”, якая трымае ўвесь Касцёл, і падзякаваў за сведчанне веры ў выпрабаваннях.
На развітанне, выходзячы з храма ў вечаровую цемру, Леў XIV пакінуў вернікам кароткае, але змястоўнае пасланне. Ён адзначыў, што хоць сонца ўжо зайшло, сапраўднае святло вернікаў не залежыць ад часу сутак. “Вы заўсёды з’яўляецеся святлом для свету”, - запэўніў Пантыфік, удзяляючы апошняе благаслаўленне перад ад’ездам у Ватыкан.
