Папа

Кожны чалавек важны: Папа падтрымаў перапіс бяздомных

Леў XIV падтрымаў маштабнае даследаванне становішча бяздомных у Італіі, заклікаўшы валанцёраў стаць для абяздоленых сведкамі Божай блізкасці, спачування і пяшчоты.

Аляксандр Амяльчэня - Vatican News

Пантыфік скіраваў адмысловае прывітанне ўдзельнікам нацыянальнай кампаніі "Tutti contano" ("Кожны важны"), якая стартуе ў найбуйнейшых гарадах Італіі.

У лісце на імя валанцёраў асэсар па агульных справах Дзяржсакратарыята мансіньёр Энтані Оньемучэ Экпо перадаў заахвочванне Льва XIV працягваць справу прыняцця і выслухоўвання тых, хто апынуўся на ўзбочыне жыцця.

Святы Айцец падкрэсліў, што праз гэты энтузіязм моладзь і сацыяльныя работнікі павінны сведчыць аб сапраўднай прыродзе Бога, якая выяўляецца ў "блізкасці, спачуванні і пяшчоце".

Больш чым лічбы: сустрэча, якая вяртае годнасць

Асноўная фаза апытанняў пройдзе з 26 па 29 студзеня 2026 года ў 14 гарадах, уключаючы Рым, Мілан, Неапаль і Палерма. Каля 10 тысяч валанцёраў, сярод якіх большасць складае моладзь, выйдуць на вуліцы, каб сабраць дакладныя даныя для статыстычнага бюро “Istat”.

Гэтая ініцыятыва, падтрыманая "Caritas" і асацыяцыямі дапамогі бяздомным, мае на мэце не проста статыстычны ўлік, але і паляпшэнне сістэмы падтрымкі тых, хто не мае даху над галавой.

Паводле Папы, гэты праект з’яўляецца магчымасцю для грамадства нанова адкрыць для сябе каштоўнасць кожнай асобы. Збор дакладных звестак дазволіць дзяржаўным і касцельным структурам больш эфектыўна рэагаваць на запыты самых абяздоленых, а самім валанцёрам – атрымаць вопыт непасрэднай сустрэчы з тымі, хто пакутуе.