Леў XIV сустрэўся з футбалістамі каманды “Кома”

Аляксандр Амяльчэня - Vatican News

У другой палове дня аўторка ў Ватыкане адбылася асаблівая падзея, якая аб’яднала веру і спорт. Пантыфік сустрэўся з гульцамі і кіраўніцтвам футбольнага клуба “Кома” перад іх вечаровым матчам супраць рымскага клуба “Лацыа” на рымскім Алімпійскім стадыёне ў межах 21-га тура Серыі А.

Падчас аўдыенцыі госці ўручылі Пантыфіку памятныя сувеніры, якія сімвалізуюць іх камандны дух. Капітан Альвара Марата паднёс Папе клубны шалік, а трэнер Сеск Фабрэгас перадаў вымпел. Гэтыя простыя рэчы сталі знакам глыбокай павагі спартсменаў да галавы Каталіцкага Касцёла. Прэзідэнт клуба Мірван Суварса таксама прыняў удзел у цырымоніі, падарыўшы Святому Айцу футболку з аўтографамі ўсіх гульцоў.

Такія сустрэчы ў Ватыкане сталі добрай традыцыяй, якая нагадвае пра тое, што спорт павінен спрыяць еднасці і выхаванню высокіх маральных каштоўнасцей сярод моладзі.