Леў XIV заклікаў біскупаў Перу жыць па прыкладу апосталаў

Марыя Валодзіна - Vatican News

Аўдыенцыя супала з 300-годдзем кананізацыі святога Турыбія Магравэха, якога Папа назваў духоўным заснавальнікам Касцёла ў Перу. Ён заклікаў біскупаў натхняцца гэтым святым і адказваць на сучасныя выклікі жыццём па прыкладу апосталаў (ad instar Apostolorum) – з прастатой, мужнасцю і поўным даверам да Бога.

Асаблівую ўвагу Папа надаў тэмам еднасці пастыраў і Божага народа, вернасці Евангеллю і поўнай самаадданасці служэнню, асабліва на карысць найбольш уразлівых. Ён таксама заахвоціў іх да блізкасці з людзьмі, слухання і суправаджэння кожнага на шляху веры.

Святы Айцец прызнаўся, што вельмі любіць Перу, бо бачыў там моцную веру простых людзей і моц Касцёла нягледзячы на выпрабаванні. Ён падзякаваў біскупам за іх служэнне, даручыў Касцёл у Перу апецы Найсвяцейшай Панны Марыі і ўдзяліў апостальскае благаслаўленне ўсяму перуанскаму народу.