Леў XIV на "Канцэрце з беднымі": музыка – гэта мост да Неба
Аляксандр Амяльчэня - Vatican News
Святы Айцец прысутнічаў на VI "Канцэрце з беднымі", які адбыўся ў суботу 6 снежня 2025 года вечарам у Зале Паўла VI. Пантыфік адзначыў, што гэтая ініцыятыва нарадзілася з сэрца яго папярэдніка, Папы Францішка, і стала важнай падзеяй для Рымскай дыяцэзіі.
Музыка яднае неба і зямлю
Звяртаючыся да прысутных, Папа падкрэсліў неацэнную вартасць музыкі, якая з’яўляецца боскім дарам, даступным кожнаму чалавеку, незалежна ад яго сацыяльнага статусу ці адукацыі. Ён асабліва цёпла прывітаў бедных, для якіх у першую чаргу і было арганізавана гэтае свята, падзякаваўшы ім за прысутнасць.
Святы Айцец выказаў удзячнасць кардыналу-вікарыю Бальдасарэ Рэйне, кардыналу Конраду Краеўскаму і Дыкастэрыі па міласэрным служэнні, а таксама розным дабрачынным арганізацыям за іх уклад у падрыхтоўку мерапрыемства.
Асаблівыя словы падзякі прагучалі ў адрас выканаўцаў: Хору Рымскай дыяцэзіі пад кіраўніцтвам маэстра мансеньёра Марка Фрызіны, аркестра "Nova Opera", а таксама салістаў Майкла Бубле і Серэны Аўцьеры.
Езус як песня любові
Леў XIV параўнаў музыку з мостам, які вядзе да Бога, і ўяўнай лесвіцай, што злучае зямлю з небам. Ён заўважыў, што мастацтва здольнае ўздымаць сэрцы не таму, што прымушае забыць пра пакуты, а таму што нагадвае пра галоўную праўду: мы – умілаваныя дзеці Бога, і гэта значыць значна больш, чым нашы праблемы.
Нагадваючы пра набліжэнне ўрачыстасці Божага Нараджэння, Папа звярнуў увагу на тое, што гэтая таямніца немагчымая без музыкі і гімнаў праслаўлення, падобна таму, як нараджэнне Езуса суправаджалася спевам анёлаў.
Пантыфік заклікаў вернікаў пражыць Адвэнт, рыхтуючы сэрцы да сустрэчу з Панам, вызваляючыся ад эгаізму і матэрыяльных клопатаў, каб пачуць "песню Божай любові", якой з'яўляецца сам Езус Хрыстус.
