Папа з шпіталя: адсюль вайна выглядае яшчэ больш абсурднай
Марыя Валодзіна - Vatican News
Святы Айцец спаслаўся на евангельскі ўрывак, у якім Езус заахвочвае нас задумацца пра такія пачуцці, як зрок і смак. (Лк 6:39-45). Што да зроку, Ён запрашае нас развіваць яго, каб уважліва назіраць за светам і з міласэрнасцю думаць пра бліжняга. Ён кажа: “Cпачатку вымі бервяно са свайго вока, і тады ўбачыш, як выняць шчэпку з вока твайго брата” (Лк 6:42). Толькі з такім поглядам клопату, а не асуджэння, братэрскае выпраўленне можа быць дабрачыннасцю. Бо калі яно не братэрскае, гэта не сапраўднае выпраўленне! - лічыць Папа.
“Што да смаку, Езус нагадвае нам, што “кожнае дрэва пазнаецца па ягоным плодзе” (Лк 6:42). Ад чалавека зыходзяць розныя плады, і адным з іх з’яўляюцца словы, якія выспяваюць на яго вуснах, так што “тое, чым напоўнена сэрца, гавораць вусны ягоныя” (Лк 6:45). Дрэнныя плады – гэта гвалтоўныя, хлуслівыя, вульгарныя словы; добрыя плады – гэта справядлівыя і сумленныя словы, якія надаюць смак нашым размовам”, - напісаў Святы Айцец.
Францішак заахвоціў вернікаў спытаць сябе: “Як я гляджу на іншых людзей, на сваіх братоў і сясцёр? І якім я адчуваю іх погляд на сябе? Ці добрыя мае словы, ці ж яны прасякнуты горыччу і пыхай?”
“Сёстры і браты, дасылаю вам гэтыя разважанні з шпіталя, дзе, як вы ведаеце, знаходжуся ўжо некалькі дзён пад апекай урачоў і медыцынскіх работнікаў, якім шчыра дзякую за ўвагу і клопат. Адчуваю ў сэрцы благаслаўленне, якое хаваецца ў кволасці, бо менавіта ў такія моманты мы вучымся яшчэ больш давяраць Пану. У той жа час дзякую Богу за тое, што Ён дае мне магчымасць адчуць целам і духам стан шматлікіх хворых і пакутуючых”, - напісаў Папа.
“Дзякую за малітвы, якія ўзносяцца да Пана з сэрцаў вернікаў усяго свету. Я адчуваю вашу любоў і блізкасць, і ў гэты асаблівы момант я адчуваю, як мяне нясе і падтрымлівае ўвесь народ Божы. Дзякуй усім!”
“Я таксама малюся за вас. Малюся перш за ўсё за мір. Адсюль вайна выглядае яшчэ больш абсурднай. Будзем маліцца за змучаную Украіну, Палесціну, Ізраіль, Ліван, М'янму, Судан, Ківу”, - заклікаў Францішак.
“Давярымся Марыі, нашай Маці. Добрай нядзелі і да пабачэння!” - пажадаў вернікам Папа перад малітвай Анёл Панскі.
