Папа: стан стабільны, рэнтген пацвердзіў паляпшэнне
Марыя Валодзіна - Vatican News
Увечары 12 сакавіка 2025 года Зала Друку Святога Пасада распаўсюдзіла паведамленне для журналістаў, у якім гаворыцца, што клінічны стан Францішка застаецца стабільным. Праведзеная напярэдадні рэнтгенаграфія грудной клеткі пацвердзіла паляпшэнне, адзначанае ў папярэднія дні.
Днём Святы Айцец працягваў атрымліваць высокапаточную кіслародную тэрапію, пад час начнога адпачынку – неінвазіўную механічную вентыляцыю лёгкіх.
Раніцай Пантыфік па відэасувязі сачыў за духоўнымі практыкаваннямі для супрацоўнікаў Рымскай курыі, якія праходзяць у ватыканскай Зале Паўла VI. Затым ён атрымаў Эўхарыстыю і прысвяціў некаторы час малітве, пасля чаго займаўся рухальнай фізіятэрапіяй. У другой палове дня Папа зноў далучыўся па відэасувязі да Велікапосных рэкалекцый у Ватыкане, а затым чаргаваў малітву з адпачынкам і дыхальнай фізіятэрапіяй.
Святы Айцец быў шпіталізаваны 14 лютага ў рымскую клініку "Джэмэлі" з двухбаковым запаленнем лёгкіх.
