Францішак: спакойная ноч і паступовае паляпшэнне
Святы Пасад паведаміў 9 сакавіка 2025 года, што Францішак правёў спакойную ноч у шпіталі “Джэмэлі”, дзе ён знаходзіцца з 14 лютага 2025 года. Стан здароўя Папы паступова паляпшаецца, але прагноз усё яшчэ асцярожны.
Аляксандр Амяльчэня - Vatican News
У вячэрнім бюлетэні, апублікаваным 8 сакавіка 2025 года, адзначаецца, што клінічны стан Святога Айца на працягу апошніх дзён заставаўся стабільным, назіраецца "добры водгук на тэрапію" і "паступовае, лёгкае паляпшэнне". "Папа заўсёды заставаўся без тэмпературы. Палепшыўся газавы абмен", - гаворыцца ў паведамленні. Вынікі аналізаў крыві застаюцца стабільнымі.
Нягледзячы на гэтыя пазітыўныя прыкметы, медыкі пакуль захоўваюць асцярожнасць і не спяшаюцца рабіць аптымістычных прагнозаў.
Малітвы за Папу працягваюцца
9 сакавіка 2025 года ўвечары на Плошчы Святога Пятра адбудзецца чатырнаццаты Ружанец за Папу. Узначаліць малітву кардынал Жазэ Таленціна дэ Мендонса, прэфект Дыкастэрыі па культуры і адукацыі.
09 сакавіка 2025, 10:22
