Пантыфік: без перамен мы будзем паўтараць памылкі мінулага
Аляксандр Панчанка - Vatican News
У цэнтры дыскусій удзельнікаў форума знаходзіцца “полікрызіс” – паняцце, якое, па словах Папы, “нагадвае пра драматычнасць гістарычнай сітуацыі, у якой мы жывём, дзе сыходзяцца войны, кліматычныя змены, энергетычныя праблемы, эпідэміі, міграцыйныя з’явы, тэхналагічныя інавацыі”.
“Калі мы сур’ёзна не прааналізуем наш глыбокі супраціў пераменам – як асобных людзей, так і грамадства ў цэлым, – то будзем працягваць дзейнічаць так, як рабілі падчас іншых крызісаў, у тым ліку нядаўніх. Давайце згадаем пандэмію COVID: можна сказаць, мы яе змарнавалі, бо маглі б прыкласці больш намаганняў для перамены сумлення і сацыяльных практык”, - са шкадаваннем канстатаваў Пантыфік.
На думку Святога Айца, каб прагрэсаваць і пераадольваць страхі і звычкі, неабходна прыслухоўвацца да голасу навукі. “Тэма слухання – вырашальная. Гэта адно з ключавых слоў усяго сінадальнага працэсу, які мы пачалі і які цяпер знаходзіцца на этапе рэалізацыі”, - напісаў ён. “У сустрэчы з людзьмі і іх гісторыямі, у слуханні навуковых ведаў мы ўсведамляем, наколькі нашы параметры ў галіне антрапалогіі і культуры патрабуюць глыбокага перагляду”, - дадаў Францішак, нагадаўшы пра пагрозы тэхнакратычнага і ўтылітарысцкага падыходу, якія прыводзіць да панавання закону больш моцнага – закону, які дэгуманізуе.
Папа перакананы, што міждысцыплінарны падыход да інтэрпрэтацыі свету і яго эвалюцыі “можа даць нам знакі надзеі, якіх мы шукаем як пілігрымы ў гэты Юбілейны год”. “Надзея – гэта фундаментальная пазіцыя, якая падтрымлівае нас на шляху. Яна заключаецца не ў пасіўным чаканні, а ў рашучым імкненні да сапраўднага жыцця, якое выходзіць за вузкія межы індывідуалізму”, - напісаў Святы Айцец.
Пантыфік адзначыў, што перад абліччам складанага крызісу планетарнага маштабу патрэбны глабальныя інструменты, якія стануць знакамі надзеі для ўсіх. У гэтым кантэксце ён звярнуў увагу на “паступовую страту значнасці міжнародных арганізацый, якая была таксама падарвана блізарукімі падыходамі, скіраванымі на абарону прыватных і нацыянальных інтарэсаў”.
“Аднак мы павінны працягваць рашуча садзейнічаць развіццю больш эфектыўных сусветных арганізацый, здольных забяспечваць глабальнае агульнае дабро, ліквідаваць голад і галечу і абараняць асноўныя правы чалавека”, – сцвердзіў Папа, падкрэсліўшы, што такім чынам падтрымліваецца мультылатэралізм, які не залежыць ад зменлівых палітычных абставін і мае стабільную эфектыўнасць. “Гэта неадкладная задача, якая датычыць усяго чалавецтва”, – дадаў Святы Айцец.
