Пантыфік да місіянераў міласэрнасці: Пан ніколі не пакідае нас!
Марыя Валодзіна - Vatican News
З 28 па 30 сакавіка 2025 года Рым прымае больш за 500 святароў-місіянераў міласэрнасці, якія прыбылі сюды з розных краін свету для святкавання Юбілею. 29 сакавіка 2025 года ўдзельнікі падзеі здзейснілі паломніцтва да Святой Брамы ватыканскай базілікі, а таксама маліліся ў Лурдскім гроце ў Ватыканскіх садах. Зачытаць папскае пасланне да пілігрымаў было даручана арцыбіскупу Рына Фізікеле, прапрэфекту Дыкастэрыі па евангелізацыі. У ім Святы Айцец запэўніў святароў, што вельмі хацеў бы сустрэцца з імі і асабіста выказаць сваю ўдзячнасць і падтрымку.
Пантыфік падзякаваў місіянерам міласэрнасці за тое, што сваім служэннем яны “сведчаць пра бацькоўскі твар Бога, бязмежна вялікага ў любові, які кліча ўсіх да навяртання і заўсёды аднаўляе сваім прабачэннем. Навяртанне і прабачэнне – гэта два ласкавыя дотыкі, якімі Пан выцірае слёзы з нашых вачэй; гэта рукі, якімі Касцёл абдымае нас, грэшнікаў; гэта ногі, якімі мы крочым па зямным шляху. Езус, Збаўца свету, адкрывае нам дарогу, па якою мы ідзем разам, следуючы за Ім у моцы Яго Святога Духа, які ёсць Духам спакою”, - напісаў Папа. Пасланне было падрыхтавана 19 сакавіка 2025 года, ва ўрачыстасць святога Юзафа, падчас знаходжання Пантыфіка ў шпіталі "Джэмэлі".
Святы Айцец заахвоціў спаведнікоў “быць уважлівымі да тых, хто прыходзіць да іх, гатовымі прыняць іх і цярпліва суправаджаць тых, хто жадае аднавіць сваё жыццё і вярнуцца да Пана. Бо менавіта Божая міласэрнасць перамяняе нас унутрана, змяняе нашыя сэрцы: прабачэнне Пана ёсць крыніцай надзеі, бо мы заўсёды можам разлічваць на Яго, у якой бы сітуацыі ні апынуліся. Бог стаў чалавекам, каб адкрыць свету, што Ён ніколі не пакідае нас!” – гаворыцца ў пасланні.
“Дарагія браты, жадаю вам плённага паломніцтва. Ад усяго сэрца благаслаўляю ваша апостальскае служэнне, просячы Беззаганную Панну Марыю быць для вас Маці міласэрнасці. І, калі ласка, не забывайцеся маліцца за мяне”, - завяршыў свой зварот Францішак.
