Гадавіна абрання Францішка на Пасад святога Пятра
Марыя Валодзіна - Vatican News
На дванаццатым годзе свайго пантыфікату 88-гадовы Папа Францішак правёў 45 сустрэч з вернікамі на малітвах "Анёл Панскі" і "Regina Caeli", 32 агульныя аўдыенцыі, 30 Імшаў і амаль 230 сустрэч і аўдыенцый.
24 снежня 2024 года Пантыфік адчыніў Святую Браму Базілікі Святога Пятра, распачаўшы Юбілей Надзеі.
Праз два дні ён адчыніў Святую Браму ў рымскай турме “Рэбібія”, заклікаўшы ўсіх, хто знаходзіцца ўнутры і звонку, да адкрытасці сэрцаў.
У кастрычніку 2024 года Францішак правёў заключную сесію Сінода Біскупаў па сінадальнасці, якая падагульніла трохгадовы працэс абнаўлення Касцёла, накіраваны на пашырэнне ўдзелу ўсіх вернікаў у яго жыцці.
У верасні 2024 года Папа здзейсніў сваё самае доўгае апостальскае падарожжа ў Інданезію, Папуа-Новую Гвінею, Усходні Тымор і Сінгапур.
У тым жа месяцы ён здзейсніў візіт у Люксембург і Бельгію, а ў снежні 2024 года пабываў на французскім востраве Корсіка.
Святы Айцец таксама здзейсніў тры пастырскія візіты ў італьянскія гарады Венецыя, Верона і Трыест у маі-ліпені 2024 года.
Акрамя таго, Францішак апублікаваў сваю чацвёртую энцыкліку “Dilexit nos”, прысвечаную ролі Найсвяцейшага Сэрца Езуса ў сучасным грамадстве.
Ён узначаліў дзясяты за ўвесь свой пантыфікат кансісторый, надаўшы кардынальскую годнасць 21 новаму іерарху з розных куткоў свету, у тым ліку з Ірана, Японіі, Чылі, Філіпінаў і Алжыра.
На працягу года Папа дасылаў лісты падтрымкі і тэлеграмы спачування рэлігійным лідарам у зонах канфліктаў і рэгіёнах, пацярпелых ад катастроф. Ён ніколі не стамляўся заклікаць усіх да міру.
14 лютага 2025 года Святы Айцец быў шпіталізаваны з двухбаковай пнеўманіяй. 6 сакавіка, калі найбольш крытычны перыяд хваробы мінуў, Папа скіраваў аўдыёпасланне да вернікаў, якія маліліся за яго выздараўленне на Плошчы Святога Пятра. “Дзякую вам ад усяго сэрца за малітвы, якія ўзносіце за маё здароўе на плошчы. Я суправаджаю вас адсюль. Няхай Бог благаславіць вас, а Панна абараняе. Дзякую”, - прамовіў па-іспанску Святы Айцец.
