Францішак у стабільным стане, бронхаспазмаў не назіраецца
Аляксандр Амяльчэня - Vatican News
Паводле афіцыйнага камюніке Залы Друку Святога Пасада, апублікаванага сёння ўвечары, 1 сакавіка 2025 года, стан здароўя Папы застаецца стабільным. У паведамленні адзначаецца, што Святы Айцец, які ўжо шаснаццаць дзён знаходзіцца ў клініцы “Джэмэлі”, падтрымлівае добрыя паказчыкі газавага абмену, чаргуючы неінвазіўную механічную вентыляцыю з працяглымі перыядамі высокапаточнай кіслароднай тэрапіі.
"У Святога Айца адсутнічае павышаная тэмпература і не выяўлены лейкацытоз. Гемадынамічныя параметры стабільна захоўваюцца ў норме. Пантыфік працягвае харчавацца і рэгулярна выконваць рэспіраторную фізіятэрапію, праяўляючы актыўнае супрацоўніцтва", - паведамляецца ў бюлетэні Залы Друку.
Важным станоўчым паказчыкам з'яўляецца адсутнасць новых эпізодаў бронхаспазму. Паводле інфармацыі медыкаў, Францішак захоўвае поўную яснасць свядомасці і арыентацыю. У другой палове дня 1 сакавіка 2025 года ён прыняў Святую Камунію, пасля чаго прысвяціў час малітве.
Нягледзячы на стабільнасць стану Пантыфіка, прагноз па-ранейшаму застаецца стрыманым. Урачы клінікі “Джэмэлі” працягваюць пільна сачыць за здароўем Францішка, які знаходзіцца пад іх наглядам ужо больш за два тыдні.
