Францішак: няхай паўсюль змоўкне зброя і будзе пачуты крык аб міры

Завяршаючы ўрачыстую літургію з нагоды Юбілею ўзброеных сіл, паліцыі і службаў бяспекі, Папа падкрэсліў, што мэтай вайсковай службы з'яўляецца законная самаабарона, а не панаванне над іншымі народамі.

Марыя Валодзіна - Vatican News

Перад малітвай Анёл Панскі, якая прайшла 9 лютага 2025 года на Плошчы Святога Пятра падчас Эўхарыстычнага набажэнства для вайскоўцаў, Святы Айцец узяў слова, каб падзякаваць прысутным за ўдзел у юбілейнай пілігрымцы, а таксама вайсковым ардынарыям і капеланам за душпастырскае служэнне.

Ён звярнуўся да вайскоўцаў усяго свету, заклікаючы ва ўмовах канфліктаў прытрымлівацца міжнародных канвенцый, а таксама шанаваць тварэнне. "Дасылаю сваё прывітанне ўсім вайскоўцам свету і хацеў бы нагадаць пра вучэнне Касцёла адносна гэтай тэмы", - сказаў Папа. Ён нагадаў словы 79-га параграфа пастырскай канстытуцыі Gaudium et spes, аднаго з галоўных дакументаў Другога Ватыканскага Сабору: "Тыя, хто служаць Радзіме ў шэрагах войска, павінны лічыць сябе таксама служыцелямі бяспекі і свабоды народаў".

"Вайсковая служба павінна ажыццяўляцца толькі з мэтай законнай самаабароны, а не для навязвання панавання над іншымі народамі. Заўсёды прытрымлівацца міжнародных канвенцый па пытаннях канфліктаў. І перш за ўсё – свята шанаваць жыццё і тварэнне", - нагадаў Францішак.

Папа скіраваў свае думкі да краін, якія пакутуюць ад войнаў. Ён заклікаў “маліцца за мір у змучанай Украіне, Палесціне, Ізраілі, М'янме, на ўсім Блізкім Усходзе, у Ківу, Судане. Няхай паўсюль змоўкне зброя і будзе пачуты крык народаў, якія прагнуць міру", - заклікаў Святы Айцец.