Прэзідэнт Мальты здзейсніла візіт у Ватыкан
Аляксандр Панчанка - Vatican News
Францішак і Мірыям Спітэры Дэбона размаўлялі за закрытымі дзвярыма каля дваццаці хвілін. Затым адбыўся традыцыйны абмен падарункамі. Папа ўручыў сваёй госці керамічную скульптуру Пяшчота і любоў і спецыяльныя выданні некаторых сваіх дакументаў.
Палітык падарыла Святому Айцу кошык з мальтыйскімі пачастункамі, а таксама перадала яму апарат для правядзення фізіятэрапіі, прызначаны для ватыканскай амбулаторыі, якая аказвае дапамогу бедным.
У ходзе перамоў, якія адбыліся ў Дзяржаўным сакратарыяце, была выказана ўзаемная ўдзячнасць за трывалыя двухбаковыя адносіны паміж Апостальскай Сталіцай і Мальтай, а таксама пацверджана прыхільнасць да далейшага ўмацавання супрацоўніцтва ў галінах, якія ўяўляюць узаемную цікавасць.
Падчас гутаркі закраналіся некаторыя актуальныя міжнародныя тэмы. Асаблівая ўвага была нададзена сітуацыі ў Міжземнаморскім рэгіёне, канфліктам у Ізраілі і Палесціне, крызісу ва Украіне, а таксама праблемам, звязаным з міграцыяй, - паведаміла Зала Друку Апостальскай Сталіцы.
